पिएनजीविरुद्ध नेपालले टस जितेर ब्याटिङ गर्ने

नेपाल प्रेस

२०७८ भदौ २५ गते १५:३५

तस्वीर सौजन्य: एनएसजेएफ ।

काठमाडौैं । पपुवा न्युगिनीविरुद्धको दोस्रो एकदिवसीय अन्तर्राष्ट्रिय खेलमा नेपालले टस जितेर ब्याटिङ रोजेको छ ।

ओमानको अल अमेरत क्रिकेट मैदानमा केही बेरमा सुरु हुने खेलमा नेपालका कप्तान ज्ञानेन्द्र मल्लले टस जितेर ब्याटिङ रोजेका छन् ।

नेपालले गत मंगलबार भएको पहिलो खेलमा पिएनजीविरुद्ध २ विकेटको जित निकालेको थियो । त्यो खेलबाट आज मुख्य प्रशिक्षक डेभ वाटमोरले तीन खेलाडी परिवर्तन गरेका छन् ।

त्यो टोलीबाट शरद भेसावकर, आरिफ शेख र पवन सर्राफलाई बाहिर राख्दै विनोद भण्डारी, करण केसी र सुशन भारीलाई प्लेइङ-११ मा राखेका छन् ।

ओमान-अमेरिका-नेपाल ट्राई नेसन वान् डे सिरिजका लागि ओमान पुगेको नेपालले तयारी स्वरुप पिएनजीसँग दुई एकदिवसीय खेलिरहेको हो ।