पिएनजीविरुद्ध नेपालको २ सय रन पूरा

काठमाडौं । पपुवा न्युगिनीविरुद्ध ओमानमा जारी एकदिवसीय अन्तर्राष्ट्रिय क्रिकेटमा नेपालले २ सय रन पूरा गरेको छ । रोहित पौडेलको शानदार इनिङप्रेरित नेपालले ४६.४ ओभर सकिँदा ६ विकेट गुमाएर २१३ रन बनाएको छ ।

ओमानको अल अमेरत क्रिकेट मैदानमा टस जितेर ब्याटिङ रोजेको नेपालका रोहित पौडेल ८२ र करण केसी २७ रन बनाएर खेलिरहेका छन् ।

१० रन नपुग्दै दुवै ओपनरलाई गुमाएको नेपालको इनिङ सम्हालेका रोहितले कप्तान ज्ञानेन्द्र मल्लसँग ८९ रनको साझेदारी गरेका थिए । त्यसपछि विनोद भण्डारीसँग ३७ रनको साझेदारी गर्दै अर्धशतक बनाएका थिए ।

रोहित सन् २०१९ मा युएईविरुद्ध अर्धशतक बनाउँदा अन्तर्राष्ट्रिय क्रिकेटमा अर्धशतक बनाउने सबैभन्दा कान्छो खेलाडी बनेका थिए ।

अमेरिका र ओमानसँगको त्रिदेशीय एकदिवसीय शृंखलाका लागि ओमान पुगेको नेपालले पिएनजीसँग तयारी स्वरुप दुई एकदिवसीय खेलेको हो ।

शृंखला १३ सेप्टेम्बरदेखि सुरु हुनेछ ।