नर्वेको आमचुनावमा बामपन्थी दललाई स्पष्ट बहुमत, जोनस बहुमतको प्रधानमन्त्री बन्दै

ओस्लो । लेबर दलका नेता जोनस घार स्टोरले नेतृत्व गरेको प्रतिपक्षी बामपन्थी दलले बहुमतसहित नर्वेको आमचुनावमा जित हासिल गरेको छ । उक्त दलले मुलुकको तेल उद्योगको मुद्दालाई चुनावी एजेन्डा बनाएको थियो ।

स्टोर नेतृत्वको दलको जितसँगै सन् २०१३ देखि सत्तामा रहेको कन्जरभेटिभ प्रधानमन्त्री एरिना सोलवर्गको दल सत्ताबाट बाहिरिएको छ ।

‘हामीले प्रतिक्षा गरिरहेका थियौं । हामी आशावादी थियौं । हामी कडा मिहेनत गरेका थियौं । हामी अन्ततः यो भन्न सक्छौं : हामीले जित्यौं ।’ वर्तमान प्रधानमन्त्री सोलवर्गको पराजय निश्चित भएपछि आगामी प्रधानमन्त्रीमा नियुक्त हुने अपेक्षा गरिएका स्टोरले आफ्ना समर्थकलाई सम्बोधन गरेका छन् ।

९७.५ प्रतिशत मतगणना हुञ्जेल लेबर र अन्य चार मध्यबामपन्थी दलले एकसय सिट हासिल गर्ने अपेक्षा गरिएको छ । निर्वाचन आयोगको मतगणनामा अहिले ८१ सिट ती दलले जितेका छन् ।

नर्वेली संसदको १६९ सिटमध्ये सामान्य बहुमतका लागि ८५ सिट आवश्यक पर्छ । ‘नर्वेले स्पष्ट संकेत गरेको छ कि नर्वेली जनता निश्पक्ष समाज चाहन्छन्’ सामाजिक असमानताविरुद्ध अभियान चलाएका ६१ वर्षिय एक नर्वेली अर्बपतिले भने ।‘नयाँ सरकार गठनका लागि आवश्यक स्पष्ट बहुमत प्राप्त गरेकोमा म जोनस घार स्टोरलाई बधाइ दिन चाहन्छु’ ६० वर्षिया वर्तमान प्रधानमन्त्री सोलबर्गले हार स्वीकार्दै भनिन् ।