धितोपत्र बोर्डका अध्यक्षमाथिको छानविन प्रतिवेदन बुझाइयो

काठमाडौं । नेपाल धितोपत्र बोर्डका अध्यक्ष भिष्मराज ढुंगानामाथि सेयर चलखेलसम्बन्धीको आरोपको सम्बन्धमा जाँचबुझ गर्न गठित समितिले प्रतिवेदन बुझाएको छ ।

समितिका अध्यक्ष उच्च अदालतका पूर्वन्यायाधीश अनन्तराज डुम्रेले अर्थमन्त्री जनार्दन शर्मासमक्ष प्रतिवेदन बुझाएका हुन् । ढुंगानाले धितोपत्रको भित्री कारोबार तथा धितोपत्र व्यवसाय गरी बोर्डलाई हानी नोक्सानी पुर्‍याई बोर्डको हित र पुँजी बजारको विकासविपरीत हुनेगरी पदीय आचरणविपरीत काम गरेको आरोपपछि भदौ १६ गते मन्त्रिपरिषद् बैठकले जाँचबुझ समिति गठन गरेको थियो । समितिलाई प्रतिवेदनका लागि १५ दिनको समय सीमा तोकिएको थियो ।

अर्थमन्त्री शर्माले प्रतिवेदनको अध्ययन गरेर सरकारले आवश्यक निर्णय लिने आश्वासन दिए । सेयर बजार आफ्नै नियम र पद्धतिमा अघि बढ्ने विषय भएकोले मन्त्रीको कारणले सेयर बजार घटबढ हुने कुरा नभएको उनले बताए ।