भारत र फ्रान्सले इन्डो-प्यासिफिक क्षेत्रमा सहकार्य गर्ने

काठमाडौं । भारत र फ्रान्सले हिन्द प्रशान्त क्षेत्रमा साझेदारी गर्नेबारे छलफल गरेका छन् ।भारतीय प्रधानमन्त्री नरेन्द्र मोदी र फ्रान्सेली राष्ट्रपति इमानुएल म्याक्रोनबीच आज टेलिफोन वार्ता भएको फ्रान्सेली राष्ट्रपति कार्यालयले जनाएको छ ।

अष्ट्रेलियासँगको ४० बिलियन डलरको आणविक पनडुब्बी निर्माण सम्बन्धी रक्षा सम्झौता स्थगित भएपछि फ्रान्सले भारतसँग इन्डो-प्यासिफिक क्षेत्रमा सहकार्य गर्नेबारे छलफल चलाएका हुन् ।

मोदी र म्याक्रोनबीच अफगानिस्तान संकटबारे पनि छलफल भएको जनाइएको छ । गतसाता अष्ट्रेलियाले आफूसँगको रक्षा सम्झौता स्थगित गरेपछि फ्रान्सले अमेरिका र अष्ट्रेलियाबाट आफ्ना राजदूत फिर्ता बोलाएको थियो ।

अष्ट्रेलियाले सन् २०१६ मा फ्रान्ससँग भएको रक्षा सम्झौता स्थगित गर्ने घोषणा गरेको थियो । अमेरिका, बेलायत र अष्ट्रेलियाबीच गतसाता अकुस नामक गठबन्धन बनाउने सहमति भएको थियो ।

तर, यो सम्झौताप्रति चीनले क्रुद्ध प्रतिक्रिया जनाएको छ ।