सरकारले ल्यायो दुई स्वास्थ्य विधेयक, कोभिड अस्पताल संचालन र खोप खरिदको कानूनी अड्चन हट्ने

काठमाडौं । सरकारले कोभिड-१९ संकट व्यवस्थापन र औषधी ऐन २०३५ लाई संशोधन गर्न बनेको विधेयक संघीय संसदमा पेश गर्न स्वीकृति दिने निर्णय गरेको छ ।

मंगलबार बसेको मन्त्रिपरिषद् बैठकले उक्त निर्णय गरेको सरकारका प्रवक्ता एवम कानूनमन्त्री ज्ञानेन्द्रबहादुर कार्कीले जानकारी दिए । सरकारले विधेयक पेश गर्न स्वीकृति दिएसँगै कोभिड युनिफाइड अस्पताल र खोप खरिदमा उब्जेको कानूनी समस्या हट्ने भएको छ।

केपी ओली सरकारले ‘कोभिड-१९ संकट व्यवस्थापन अध्यादेश २०७८’ अनुसार वीर अस्पतालको भवनमा कोभिड युनिफाइड अस्पताल सञ्चालनमा ल्याएको थियो ।

सरकारले ६० दिन भित्रै अध्यादेश पारित नगराउँदा ‘कोभिड-१९ संकट व्यवस्थापन अध्यादेश २०७८’ निष्क्रिय भएको थियो । त्यससँगै अस्पताल संचालनमा कानूनी समस्या आएको थियो।

‘औषधि (तेस्रो संशोधन) अध्यादेश २०७८’ निष्क्रिय हुँदा कोभिड खोप खरिदको प्रक्रियामा कानूनी समस्या आउने अवस्था थियो । आज सरकारले प्रतिस्थापन विधेयक ल्याएसँगै यो समस्या पनि हट्ने छ ।