राष्ट्रसंघीय महासभामा बाइडेनको सम्बोधन : हामीले कसैसँग शीतयुद्ध चाहेका छैनौं

न्यूयोर्क । अमेरिकी राष्ट्रपति जो बाइडेनले जलवायु परिवर्तनविरुद्धको चुनौतिसँग लडनेबारे विकासोन्मुख मुलुकलाई सघाउन सन् २०२४ सम्म सहायतालाई दोब्बर वृद्धि गर्दै ११.४ बिलियन डलर पु¥याउने घोषणा गरेका छन् ।

राष्ट्रसंघ महासभालाई मंगलबार राती सम्बोधन गर्दै राष्ट्रपति बाइडेनले उक्त कार्यका लागि आफूले अमेरिकी संसदसँग मिलेर काम गर्ने समेत जनाए । सन् २०२० सम्म १०० बिलियन डलर सहायता रकम पु¥याउने एक दशकअघिको एउटा सम्झौतालाई पछ्याउँदै बाइडेनले उक्त घोषणा गरेका हुन् ।

‘यसको सबैभन्दा राम्रो पक्ष भनेको, यस्तो महत्वाकाङ्क्षी लगानी गर्नु भनेको एउटा राम्रो जलवायु नीति बनाउनु मात्र हैन’ बाइडेनले भने, ‘यो भनेको प्रत्येक मुलुकले आफू र आफ्नो भविष्यमाथि लगानी गर्नुपनि हो ।’

अक्टोबर १ देखि नोभेम्बर १२ सम्म ग्लास्गोमा हुन लागेको राष्ट्रसंघीय जलवायु सम्मेलन हुन ६ साताभन्दा कम समय बाँकी रहँदा बाइडेनको यस्तो भनाई आएको हो । बाइडेनको यो जलवायु मुद्दा संसदमा विचाराधिन पूर्वाधार र बजेट कानूनसँग पनि जोडिएको छ ।

यदी यो कानून पारित नभए बाइडेन कोप–२६ सम्मेलनमा रित्तै हात जानुपर्ने हुनसक्छ । रोयटर्सले बाइडेनको यो घोषणालाई जोखिमपूर्ण निर्णय पनि भनेको छ ।

जलवायु सम्मेलन आयोजक राष्ट्र बेलायती प्रधानमन्त्री बोरिस जोन्सनले चाहिँ जलवायु लगानी र विकासोन्मुख र विकसित मुलुकबीच विश्वासमा वृद्धि गर्ने जनाएका छन् ।

३० मिनेट लामो सम्बोधनमा बाइडेनले विश्व सहकार्यको नयाँ युग जरुरी भएको बताए । हिउँदयाममा लाग्ने डढेलो, चर्को गर्मी, कोरोनाभाइरस महामारीविरुद्ध जुध्न सामूहिक एकता समेत जरुरी भएको बताएका छन् । सम्बोधन अवधिभर बाइडेनले चीनको नाम नलिइकनै बेइजिङको बढ्दो प्रभुत्वलाई रोक्न अमेरिका राष्ट्रिय सुरक्षा र प्रतिस्पर्धालाई ख्याल गर्दै अघि बढ्ने बताए ।

बाइडेनले कसैसँग पनि अमेरिकाले शीतयुद्ध नचाहेको बताए ।