हुवावे मालिक रिहा भएलगत्तै चीनद्वारा दुई क्यानडेली नागरिक पनि रिहा

बेइजिङ । हुवावे प्रमुख मेङ वान्झाउलाई क्यानडाले रिहा गरेलगत्तै चीनले पनि दुई क्यानडेली नागरिकलाई आज रिहा गरेको छ ।

वान्झाउ रिहा भएको केही घण्टामै बेइजिङले पक्राउ गरेका दुई क्यानडेली नागरिक माइकल स्पाभोर र माइकल कोभरिगलाई पनि रिहा गरिएको हो ।

सन् २०१८ मा हुवावे प्रमुख क्यानडामा पक्राउ परेपछि जासूसीको आरोपमा चीनले पनि यी दुईजनालाई पक्राउ गरेको थियो । यो घटनापछि चीन र पश्चिमा मुलुकको कूटनीतिक तनाव अन्त्य भएको ठानिएको छ ।

तर, आलोचकले भने चीनले सौदाबाजीका लागि उनीहरुलाई पक्राउ गरिएको आरोप लगाउने गरेका छन् । चीनबाट रिहा गरिएलगत्तै उनीहरु क्यानडातर्फ प्रस्थान गरेको बीबीसीले जनाएको छ ।

क्यानडाका प्रधानमन्त्री जस्टिन ट्रुडोले ती दुई नागरिक रिहा भएर घर फर्कनु खुशिको कुरा भएको बताएका छन् । ‘बितेका १ हजार दिनदेखि उनीहरुले धैर्य देखाए’ उनले भने ।