जसपा मधेस प्रदेश समिति बैठक जारी, राजपाबाट आएकाको समायोजन हुँदै

जनकपुरधाम । जनता समाजवादी पार्टी (जसपा) नेपालको मधेस प्रदेश समितिको बैठक सुरू भएको छ । धनुषाको लक्ष्मीनियाँ गाउँपालिकास्थित होटल बाबाको पढावामा जारी बैठकमा अध्यक्ष उपेन्द्र यादव सहभागी छन् ।

यादवको प्रमुख आतिथ्य र प्रदेश २ का भूमि व्यवस्था, कृषि तथा सहकारी मन्त्री समेत रहेका तत्कालीन समाजवादी पार्टीका मधेस प्रदेश समिति अध्यक्ष विजय कुमार यादवको अध्यक्षतामा बैठक बसेको हो ।

तत्कालीन राष्ट्रिय जनता पार्टी (राजपा) र समाजवादी पार्टी मिलेर जसपा बनेको थियो । तर, मधेस प्रदेश समिति समायोजन भएको थिएन । आजको बैठकको प्रमुख एजेण्डा मधेस प्रदेश समिति समायोजन, पुनर्गठन तथा विस्तार रहेको नेताहरूले बताएका छन् ।

पूर्वराजपाबाट आएकालाई आजै प्रदेश कमिटीमा समायोजन घोषणा गरिनेछ । जसपाको संशोधित विधानअनुसार प्रदेश कमिटीमा अब १५० जना रहने छन् । ११ जना पदाधिकारीको संख्या बढाएर १५ जना पुर्‍याइएको छ ।

जसपा फुटेर लोसपा गठन भए पनि प्रदेश २ मा तत्कालीन राजपाबाट निर्वाचित ९ सांसद जसपामै छन् । प्रदेश २ मा अहिले जसपाका ३८ सांसद छन् ।