आइतबार ८ सय कोभिड बिरामी थपिए, ९ जनाको मृत्यु

काठमाडौं । पछिल्लो २४ घण्टामा आइतबार देशभर ८३४ जना कोभिड संक्रमित थपिएका छन् । १३ हजार ७३६ वटा नमुना परीक्षण गर्दा (पीसीआर ८,५८९ तथा एटीजेन ५,१४७) जनामा संक्रमण पुष्टि भएको हो ।

सोही अवधिमा १२७९ जना निको भएका छन् भने थप ९ जनाको मृत्यु भएको छ । गत २४ घण्टामा १ लाख २३ सय १ जनाले कोभिड–१९ विरुद्धको खोप लगाएका छन् ।

मन्त्रालयका अनुसार हालसम्म मुलुकमा १९ हजार १४२ जना सक्रिय संक्रमित छन् ।

नेपालमा कूल ७ लाख भन्दा बढी कोरोनाभाइरस संक्रमित छन् भने ११ हजार ९६ जनाले ज्यान गुमाएका छन् ।

अहिलेसम्म आईसीयूमा ३६८ जना, भेन्टिलेटरमा १२० जना, होम आइसोलेशनमा १७,८१३ जना, संस्थागत आइसोलेशनमा १,३२९ र क्वारेन्टाइनमा २३० जना रहेको तथ्यांकमा उल्लेख छ ।

मन्त्रालयको अनुसार नेपालमा कोरोनाभाइरसको संक्रमणदर ६ प्रतिशत छ भने मृत्युदर १.४ प्रतिशत छ । मुलुकमा निको हुनेको दर ९६.२ प्रतिशत छ ।