जर्मनी चुनाब : मध्यबामपन्थी दल एसडीएफले झिनो मतान्तरले जित्यो चुनाब, सरकार गठनको गृहकार्य सुरु

बर्लिन । जर्मनीको सोसल डेमोक्र्याटिक पार्टीले झिनो मत अन्तरले संसदीय चुनाव जितेको छ । रोयटर्सका अनुसार सन् २००५ यताको पहिलो राष्ट्रिय चुनाव जितेपछि उक्त दलले सोमबारदेखि सरकार गठनको गृहकार्य थालेको छ ।

यो चुनाबसँगै एन्जेला मर्केल १६ बर्षपछि सत्ताबाट बाहिरिएकी छिन् । मध्य बामपन्थी दल सोसल डेमोक्र्याटले कूल खसेको मतमध्ये २५.७ प्रतिशत प्राप्त गरेको छ भने मर्केलको पार्टी सीडीयू र सीएसयूले २४.१ प्रतिशत मत प्राप्त गरेका छन् । ग्रीन पार्टीले खसेकोमध्ये १४.८ प्रतिशत र लिबरल फ्रि डेमोक्र्याटले ११.५ प्रतिशत प्राप्त गरेका छन् । एसपीडी पार्टीको जितलाई युरोपसहित अमेरिकामा जो बाइडेनले सन् २०२० मा जितेको मध्यबामपन्थी दलकै श्रृंखलामा हेरिएको छ ।

नर्वेमा पनि गत महीना मध्य बामपन्थी दलले चुनाब जितेको थियो । जर्मनीमा सोसल डेमोक्र्याट पार्टीको तर्फबाट चान्सलरका उम्मेदवार ओलफ स्कोल्जले आगामी क्रिसमस अगाडि नै गठबन्धन दलबीच सहमति जुटाइने बताए ।

दोस्रो स्थान हासिल गरेको दल कन्जरभेटिभको तर्फबाट चान्सलरका उम्मेदवार आरमिन लासचेटले दोस्रो स्थानमा जितेपनि सरकार गठनका लागि गृहकार्य भैरहेको बताए ।

गठबन्धन दलहरुले नयाँ सरकारको सहमति नजुटाउँदासम्म वर्तमान चान्सलर एन्जेला मर्केल कामचलाउ चान्सलर रहने भएकी छिन् । सोमबारदेखि दलहरुले नयाँ सरकार गठनका लागि अनौपचारिक भेटवार्र्तालाई तीव्र तुल्याएका छन् ।

बहुमतको सरकार बनाउन सम्भवतः एसपीडीले अन्य दलहरु ग्रीन र एफडीपीको समर्थन लिने तयारी गरेको छ । एसपीडीका महासचिव लार्स किंगबेलले नेता स्कोल्जलाई आगामी चान्सलर बनाउन पार्टीले सोमबारदेखि नै कसरत गर्ने बताए । उनका अनुसार एसडीएफले ग्रीन र एफडीपीलाई विश्वासमा लिने तयारी गरेको छ । ६३ वर्षिय स्कोल्जले विश्वासको मत प्राप्त गर्न सके दोस्रो विश्वयुद्धपछि जर्मनीको चौंथो चान्सलर बन्ने मौका पाउनेछन् ।

तर, ६० वर्षिय नेता लास्चेटले दोस्रो स्थान भएपछि सरकार गठनको गृहकार्यलाई नछाड्ने बताएका छन् । सन् २००५ यता एन्जेला मर्केल सत्तामा थिइन् । तर, बर्लिनका युरोपेली र अन्य साझेदार मुलुकले भने नयाँ बन्ने जर्मनी सरकारले कस्तो विदेश नीति आत्मसात गर्छ भन्ने कुरा जान्न अझै दुई महीना कुर्नुुपर्नेछ ।