कांग्रेसको भविष्यका लागि यो महाधिवेशन महत्वपूर्ण छ : सांसद चौधरी

काठमाडौं । नेपाली कांग्रेसका सांसद विनोद चौधरीले पार्टीको अधिवेशनबाट आफू निकै उत्साहित रहेको बताएका छन् ।
नवलपरासी बर्दघाट सुस्तापूर्वको देवचुली नगरपालिकाको नेतृत्वका लागि मतदान गरेपछि चौधरीले १४ औं महाधिवेशनले पार्टीको भविष्य र आगामी बाटो निर्धारण गर्ने बताएका हुन् ।

‘हामी सम्पूर्णरूपले महाधिवेशनमा होमिएका छौं । पार्टीको भविष्य र आगामी बाटो निर्धारण गर्ने यो उल्लासमय राजनीतिक महोत्सवलाई लिएर म निकै उत्साहित छु’, चौधरीले सामाजिक सञ्जालमार्फत भनेका छन् ।

नेपाली कांग्रेसको लगानी, पूर्वाधार र रोजगार दृष्टिकोण एवं दिगो परियोजना विशेष समितिको संयोजक समेत रहेका चौधरी १४ औं महाधिवेशनमा पदाधिकारीको प्रत्याशी बन्ने तयारीमा छन् । उनको नेतृत्वमा ‘गरिखाने अभियान’ सञ्चालित छ ।

महाधिवेशनको सन्दर्भमा सामाजिक सञ्जालमार्फत उनले कार्यकर्तालाई आफ्नै खुट्टामा उभ्याउन र देशलाई आर्थिक रुपमा समृद्ध बनाउन राजनीतिले योगदान गर्नुपर्नेमा जोड समेत दिएका छन् ।