रामचन्द्रको आरोप- एमालेमा सिद्धिलाल र भरतमोहन सिध्याउन ७० वर्षे ल्याए, ओलीका लागि हटाउँछन्

काठमाडौं । नेपाली कांग्रेसका वरिष्ठ नेता रामचन्द्र पौडेलले राजनीतिक दलभित्र उमेर हदको व्यवस्था अप्राकृतिक र अराजनीतिक रहेको टिप्पणी गरेका छन् ।

नेकपा एमालेमा ७० वर्षे उमेर हद लागू गरिएको सन्दर्भसमेत जोड्दै पौडेलले ‘केही नेता सिध्याउन र केही नेता जोगाउन’ उमेर हदको व्यवस्था हुने गरेको बताए ।

तनहुँमा बोल्दै पौडेलले भने, ‘एमाले पार्टीले अघिल्लो महाधिवेशनमा ७० वर्षे उमेर हद लगायो । त्यसबाट एमालेको उपलब्धी के भयो ? उसको उपलब्धी भनेको एमालेभित्रका लोकप्रिय, लोकतान्त्रिक, निष्ठावान् र चरित्रवान् दुईजना नेतालाई सिध्याइयो । भरतमोहन अधिकारी र सिद्धिलाल सिंहजस्ता लोकतन्त्रवादी र इमान भएका नेता सिध्याउन ७० वर्षे लाग्यो । उनीहरूलाई पाखा लाएपछि फेरि उमेरको कुरा हरायो । बलियाले अन्तै लगिहाले कुरा । अहिले फेरि केपी ओली ७० नपुग्दै अधिवेशन भए लागू हुन्छ, ७० पुगे भने फेरि हटाउँछन् ।’

पौडेलले कांग्रेसमा पनि विगतमा एक व्यक्ति एक पदको अवधारणा ल्याएर डा. रामशरण महतलाई राजीनामा दिन लगाइएको तर अरुलाई नियम नलागेको बताए । राजनीतिमा उमेर हदको औचित्य नरहेको भन्दै नेता पौडेलले स्वस्थ नेताले मुलुकलाई सधैँ नेतृत्व गर्न सक्ने बताए ।