साफ च्याम्पियनसिप: मनिषको गोलमा नेपालको विजयी सुरुआत

काठमाडौं । मनिष डाँगीको निर्णायक गोलप्रेरित नेपालले आजदेखि सुरु भएको साफ च्याम्पियनसिपमा माल्दिभ्सलाई १-० गोलको नतिजामा पराजित गर्दै विजयी सुरुआत गरेको छ ।

माल्दिभ्सको मालेमा जारी प्रतियोगिताको ८६औं मिनेटमा नेपालका लागि सब्स्टिच्युट खेलाडी मनिषले काउन्टर अट्याकमा गोल गरेका थिए ।

माल्दिभ्सको घरेलु मैदानमा भएको खेलमा दुवै टोलीले सुरुआतदेखि नै गोलका लागि निरन्तर प्रयास गरेका थिए । तर, निर्धारित ९० मिनेटको खेल सकिन ३ मिनेट बाँकी रहँदा नेपालका मनिषले गरेको गोल खेलको निर्णायक बन्यो ।

जितसँगै साफ च्याम्पियनसिपको इतिहासमा पहिलो पटक फाइनल पुग्ने नेपालको लक्ष्यको शानदार सुरुआत भएको छ । घरेलु समर्थकले भरिएको रंगशालमा आयोजक तथा साविक विजेता माल्दिभ्सलाई पराजित गर्नुले नेपाली टोलीको हौसला स्वत: बढ्ने छ ।

राउन्ड रोबिन पद्दतिमा जारी प्रतियोगितामा नेपालले आफ्नो दोस्रो खेलमा सोमबार राति ९:४५ बजे श्रीलंकाको सामना गर्नेछ ।