बर्ल र अमितको अर्धशतकमा काठमाडौंले दियो पोखरालाई १ सय ८३ रनको लक्ष्य

काठमाडौं । रायन बर्ल र अमित श्रेष्ठको अर्धशतक मद्दतमा काठमाडौं किङ्ग्स-११ ले एभरेष्ट प्रिमियर लिग (ईपीएल)अन्तर्गत सोमबार जारी दोस्रो खेलमा पोखरा राइनोजलाई १ सय ८३ रनको लक्ष्य दिएको छ । खराब सुरुआत गरेको काठमाडौंले इनिङमा राम्रो पुनरागमन गर्दै निर्धारित २० ओभरमा ८ विकेट गुमाएर १ सय ८२ रनको योगफल तयार गर्यो ।

पोखरा राइनोजविरुद्ध टस हारेर ब्याटिङ गरेको काठमाडौं किङ्ग्स-११ का लागि रायन बर्ल र अमित श्रेष्ठले अर्धशतकीय इनिङ खेले ।

त्रिवि क्रिकेट मैदानमा चौथो नम्बरमा काठमाडौंका लागि क्रिजमा उत्रिएका बर्लले ४३ बलमा २ चौका र ३ छक्कासहित ५० रनको इनिङ खेलेका थिए । त्यस्तै, अमितले ४१ बलमा ६ चौका र २ छक्कासहित ५६ रन जोडेका थिए ।

तेस्रो ओभरमा १६ रन जोडेर दुवै ओपनरलाई गुमाएको काठमाडौंका लागि अमितले रायन बर्लसँग १०६ रनको साझेदारी गर्दै काठमाडौंको इनिङ सम्हालेका थिए ।

काठमाडौंका लागि अन्य ब्याट्सम््यानले उल्लेख्य प्रदर्शन गर्न नसक्दा कप्तान सन्दीप लामिछानेले आक्रामक ब्याटिङ गर्दै ११ बलमा २ चौका र ३ छक्कासहित ३१ रन जोडेर पेभेलियन फर्केका थिए । यस्तै, गुल्शन झा १ रनमा अविजित रहँदा राजु रिजाल शून्यमा पेभेलियन फर्के ।

पोखराका लागि विवेक यादवले ३ तथा विक्रम शोब, किशोर महतो, नन्दन यादव र सहान अराचिगे ले १/१ विकेट लिए ।

काठमाडौं आजको खेलमा जित हासिल गरे प्ले अफमा पुग्ने चौथो टोली बन्ने छ । चितवन टाइगर्स, पोखरा राइनोज र भैरहवा ग्लाडिएटर्स यसअघि नै प्लेअफमा पुगिसकेके छन् । आजको खेलमा काठमाडौंले जित निकाले साविक विजेता ललितपुर प्याट्रिओट्स पहिलो चरणबाटै बाहिरिने छ ।