मापदण्ड पूरा नगर्ने ६ मेडिकललाई कारवाही

चितवन । चितवन भरतपुरका ६ मेडिकललाई स्थानीय प्रशासनले कारवाही गरेको छ ।

भरतपुरको चौबिसकोठीमा रहेका ती मेडिकललाई मापदण्ड पूरा नगरेको, खरिद बिक्री बिल नराखेको, दक्ष जनशक्तिको नियुक्त र शैक्षिक प्रमाणपत्र नराखेको, बढी मूल्यमा बिक्री गरेको, समय सकिएका औषधि छुट्टै नराखि एकै ठाउँमा राखेको, अनुमति नलिई सञ्चालन गरेकोकाले कारबाही गरिएको सहायक प्रमुख जिल्ला अधिकारी चुडामणि शर्माले बताए ।

मेडिकललाई कारवाही स्वरुप पाँच हजारदेखि तीन लाख रुपैयाँसम्म जरिवाना गरिएको छ ।

जिल्ला प्रशासन कार्यालयका मुद्दा शाखाका नायव सुब्बा गोपीचन्द्र दवाडीका अनुसार कारवाही पर्नेमा नवल टेन्टल क्लीनिक, भरतपुर पोलिक्लीनिक, नवल पोलिक्लिनिक, मिराकल फर्मा, रिजन फार्मेसी र अपोलो टेन्टल छन् । उपभोक्ता संरक्षण विभागले तोकेको बजार निरीक्षण अधिकृत सहायक प्रमुख जिल्ला अधिकारीले ती संस्थालाई कारवाही गरेका हुन् ।

सहायक प्रमुख जिल्ला अधिकारी चुडामणि शर्माका अनुसार नवल टेन्टल क्लिनिक, भरतपुर पोलिक्लिनिक र नवल पोलिक्लिनिकलाई तीन/तीन लाख जरिवाना गरिएको छ । मिराकल फर्मालाई दुई लाख ५० हजार, रिजन फार्मेशिलाई २० हजार र अपोलो डेन्टल क्लीनिकलाई पाँच हजार जरिवाना तोकिएको उनले जानकारी दिए ।

चाड पर्वको समयमा स्थानीय प्रशासनले अनुगमनलाई तीव्र पारेको छ ।

रासस