अब्दुल्लाह आएपछिको परिवर्तनः फिनिसिङमा नेपालको बढ्दो आत्मविश्वास

काठमाडौं । नेपाली राष्ट्रिय फुटबल टोलीको सदाबहार समस्या हो, स्कोरिङ । नेपाली राष्ट्रिय टोलीका सर्वकालिन सर्वाधिक गोलकर्ताको सूचीले पनि त्यसलाई छर्लङ्गै पार्छ । १५ वर्षअघि राष्ट्रिय टोलीको जर्सी बिसाएका पूर्वकप्तान हरि खड्का र ११ वर्षअघि राष्ट्रिय टोलीबाट अन्तिम खेले खेलका निराजन रायमाझीको १३ गोलको कीर्तिमान अझै कायम छ ।

अन्तर्राष्ट्रिय फुटबलमा बेला-बेला मात्रै झुल्किने मुलुक होइन- नेपाल । तर, सधैं दर्शनीय खेल प्रस्तुत गर्ने नेपाललाई फिनिसिङले धोका दिने गरेको यथार्थ हो । त्यसैले त अझैसम्म १३ गोलको आँकडा नेपाली फरवार्डका लागि टाढाको लक्ष्य रहिररहेको छ ।

हाल राष्ट्रिय टोलीमा भएका खेलाडीहरूमध्ये नवयुग श्रेष्ठ ७ गोलका साथ सबैभन्दा अगाडि छन् । उनलाई पछ्याउँदै अञ्जन विष्टले ६ गोल गरेका छन् । चोटसँगै विविध कारण दुई वर्षयता राष्ट्रिय टोलीबाट बाहिर रहेका विमल घर्तिमगरले ८ गोल गरेका छन् ।

प्रशिक्षक अब्दुल्लाहको नेतृत्वमा नेपालले खेलेका ९ खेलमा १२ गोल गरिसकेको छ । जुन, त्यसअघिका ९ खेलको तुलनामा ९ गोलले धेरै हो । त्यसअघिका ९ खेलमा नेपालले ३ गोल मात्र गरेको थियो । अब्दुल्लाहको नेतृत्वअघि नेपालले १२ गोल गर्न २० खेल खेलेको थियो ।

नेपालले सर्वाधिक गोलकर्ताको सूचीमा नयाँ नाम पाउन त केही समय कुर्नैपर्छ । तर, पछिल्ला खेलहरू हेर्दा नेपालको गोल स्कोरिङमा सुधारका लक्षण देखिएका छन् । नेपाली राष्ट्रिय टोलीको मुख्य प्रशिक्षकका रूपमा अब्दुल्लाह अल्मुताइरीको आगमनसँगै नेपालको खेलमा देखिने गरेको गोल खडेरीमा शीतल वर्षा भएको छ ।

गत चैत २२ गते अखिल नेपाल फुटबल संघ (एन्फा)ले अब्दुल्लाहलाई नेपाली राष्ट्रिय टोलीको पहिलो प्रो-लाइसेन्स्ड कोचको रूपमा सार्वजनिक गरेको थियो । पहिलोपटक सार्वजनिक हुँदै गर्दा नै प्रशिक्षक अब्दुल्लाले धेरैलाई चकित पार्ने प्रतिक्रिया र रवाफ देखाएका थिए ।

‘नो मोर डिफेन्सिभ’ भन्दै नेपाललाई एसिया कप छनोट र साफ च्याम्पियसीपको फाइनलमा पुर्‍याउने लक्ष्यसहित अगाडि बढेका अब्दुल्लाह अहिले एउटा अठोट पूरा गर्ने संघारमा छन् । नेपाली राष्ट्रिय टोली अहिले माल्दिभ्समा साफ च्याम्पियनसीप खेलिरहेको मात्रै छैन, सनसनी मच्चाइरहेको छ । उद्घाटन खेलमा साविक विजेतासमेत रहेको आयोजक माल्दिभ्सलाई घरेलु समर्थकले भरिएको मैदानमा स्तब्ध पार्दै प्रतियोगिताको शानदार सुरुआत गरेको नेपालले सोमबार पनि अपराजित यात्रा कायमै राख्यो ।

राउन्ड रोबिन लिग पद्दतिमा जारी प्रतियोगिताका बाँकी दुई खेलमा एक अंक मात्रै हासिल गरे पनि नेपाल इतिहासमै पहिलोपटक फाइनल पुग्ने छ । र, अब्दुल्लाहले पहिलो पत्रकार सम्मलेनमा घोषणा गरेर बारम्बार दोहोर्‍याइरहेको साफ च्याम्पियनको फाइनल लक्ष्य पूरा हुनेछ ।

प्रशिक्षक अब्दुल्लाहको नेतृत्वमा नेपालले के-कति सफलता हासिल गर्छ ? त्यो कालान्तरमा देखिने छ । तर, एउटा सकारात्मक पक्ष पक्कै स्थापित भएको छ- गोल स्कोरिङ क्षमता । नेपालले प्रशिक्षक अब्दुल्लाहको नेतृत्वमा हालसम्म ९ खेल खेलेको छ । तीमध्ये तीन खेलमा जित, एक बराबरी र पाँच खेलमा हार बेहोरेको छ ।

स्मरण रहोस्, नेपालले ती ९ मध्ये एक खेल मात्रै आफूभन्दा कमजोर टोलीसँग खेलेको छ । र, यसबीचमा ऐतिहासिक केही नतिजा र खेल नेपालले प्रस्तुत गरेको छ । अब्दुल्लाहको नेतृत्वमा नेपालले इराकविरुद्ध पहिलो मैत्रीपूर्ण खेल खेलेको थियो । आफूभन्दा धेरै माथिल्लो स्तरको इराकविरुद्ध ६-२ गोलको नतिजामा पराजित भए पनि सुरुआती समयमा नेपालले आश्चर्यजनक अग्रता बनाएको थियो । चैतमा घरेलु मैदानमा सम्पन्न थ्री नेसन्स कप खेलेको टोलीबाट १३ खेलाडी परिवर्तन गरेर युवा टोलीसहित अब्दुल्लाले आफ्नो टोली बनाउन सुरु गरेका थिए ।

मैत्रीपूर्ण खेलका लागि इराक र विश्वकप छनोटका लागि कुवेत भ्रमणमा नयाँ रहेका अधिकांश अनुहार अहिले राष्ट्रिय टोलीका महत्वपुर्ण सदस्य बनिसकेका छन् । हाल माल्दिभ्समा जारी साफको पहिलो खेलमा नेपालको जितका नायक बनेका मनिष डाँगी पनि इराकविरुद्ध डेब्यू गरेका खेलाडी हुन् ।

विश्वकप छनोटअन्तर्गत अष्ट्रेलियाविरुद्धको खेलअघि अब्दुल्लाले दिएको रोमाञ्चक प्रतिक्रिया अहिलेको नेपालको लयसँग ठ्याक्कै मेल खान्छ ।

प्रशिक्षक अब्दुल्लाहको नेतृत्वमा नेपालले के-कति सफलता हासिल गर्छ ? त्यो कालान्तरमा देखिने छ । तर, एउटा सकारात्मक पक्ष पक्कै स्थापित भएको छ- गोल स्कोरिङ क्षमता । नेपालले प्रशिक्षक अब्दुल्लाहको नेतृत्वमा हालसम्म ९ खेल खेलेको छ । तीमध्ये तीन खेलमा जित, एक बराबरी र पाँच खेलमा हार बेहोरेको छ ।

‘यदि नर्थ मेसिडोनियाले जर्मनीलाई हराउन सक्छ भने नेपालले अस्ट्रेलियाविरुद्ध आक्रामक फुटबल खेल्न किन सक्दैन ?’ अब्दुल्लाहले भनेका थिए, ‘मानिसले मलाई ‘क्रेजी’ भन्लान् तर हामी आक्रामक फुटबल खेल्छौं ।’

तर, नेपाली टोलीका मुख्य खेलाडी रोहित चन्दले ४५औं मिनेटमा रातो कार्ड पाएपछि अब्दुल्लाहको आक्रमक शैली सम्भव भएन । तर, विश्वकप छनोटकै पहिलो लेगमा ५-० ले पराजित भएको अस्ट्रेलियासँग १० जनामा सीमित भएको नेपालले ३-० को हार बेहोर्नु सम्मानजनक थियो ।

विश्वकप छनोट सकेर स्वदेश फर्किएपछि नेपालले साफ च्याम्पियनसीपको तयारी स्वरुप भारतसँग दुई मैत्रीपूर्ण खेल खेलेको थियो । नेपालमाथि सँधै हावी हुँदै आएको भारतविरुद्ध गोल गर्नु नै नेपालका लागि दुर्लभ हुन थालिसकेको थियो ।

किनभने, सन् २०१५ मा विमलले गोल गरेयता नेपालले भारतविरुद्ध एक गोल पनि गर्न सकेको थिएन भने ९ गोल खाइसकेको थियो । तर, भारतविरुद्धका दुईमध्ये पहिलो मैत्रीपूर्ण खेलमा नेपालका लागि अञ्जनले गोल गर्दै ६ वर्षको गोल खडेरी तोडे । उक्त खेल १-१ गोलको बराबरीमा सकिएको थियो । भारतविरुद्ध नेपालले दोस्रो मैत्रीपूर्ण खेलमा २-१ गोलको हार बेहोर्‍यो ।

नेपालले १९९८ यता पहिलोपटक भारतविरुद्ध लगातार दुई खेलमा गोल गर्न सफल भएको हो । नेपालले इराक, भारत, ओमान र माल्दिभ्सविरुद्ध लगातार गोल गरिरहेको छ । सोमबार राति साफ च्याम्पियनसीपको आफ्नो दोस्रो खेलमा श्रीलंकाविरुद्ध ३ गोल ठोक्यो । नेपाली राष्ट्रिय टोलीले एकै खेलमा तीन गोल नगरेको तीन वर्षभन्दा धेरै भइसकेको थियो । नेपालले सन् २०१८ मा बंगलादेशमा भएको १२औं साफ च्याम्पियनसिपमा भुटानविरुद्ध अन्तिमपटक दुईभन्दा धेरै (४-०) गोल गरेका थियो ।

प्रशिक्षक अब्दुल्लाहको नेतृत्वमा नेपालले खेलेका ९ खेलमा १२ गोल गरिसकेको छ । जुन, त्यसअघिका ९ खेलको तुलनामा ९ गोलले धेरै हो । त्यसअघिका ९ खेलमा नेपालले ३ गोल मात्र गरेको थियो । अब्दुल्लाहको नेतृत्वअघि नेपालले १२ गोल गर्न २० खेल खेलेको थियो ।

नेपाली राष्ट्रिय टोली अहिले माल्दिभ्समा साफ च्याम्पियनसीप खेलिरहेको मात्रै छैन, सनसनी मच्चाइरहेको छ । उद्घाटन खेलमा साविक विजेतासमेत रहेको आयोजक माल्दिभ्सलाई घरेलु समर्थकले भरिएको मैदानमा स्तब्ध पार्दै प्रतियोगिताको शानदार सुरुआत गरेको नेपालले सोमबार पनि अपराजित यात्रा कायमै राख्यो ।

यसबाट पनि नेपालले गोल स्कोरिङमा उल्लेख्य सुधार गरेको स्पष्ट हुन्छ । र, यसको श्रेय प्रशिक्षक अब्दुल्लाहलाई नै जान्छ । राष्ट्रिय टोलीमा लामो सयमदेखि निरन्तर खेलिरहेका खेलाडीको स्थानमा युवा खेलाडीलाई ल्याउन उनले ठूलो जोखिम उठाएका छन् ।

उनले विश्वास गरेका ती युवा खेलाडीले उनको विश्वासको ‘पे–अफ’ पनि गरिरहेका छन् । जसको उदाहरण- इराकविरुद्ध मनिष डाँगीको डेब्यू गोल, माल्दिभ्सविरुद्ध साफमा अभूतपूर्व जितमा मनिषकै निर्णायक गोल र श्रीलंकाविरुद्ध आयुष घलानको गोलसहित एक असिस्ट हो ।