मुख्यमन्त्री राउतको प्रश्न- हामी प्रदेशका सिंहदरबार हौं, मलाई नसोधी अख्तियार किन पस्यो ? (भिडिओ)

काठमाडौं । प्रदेश २ का मुख्यमन्त्री लालबाबु राउतले अख्तियार दुरुपयोग अनुसन्धानप्रति आक्रोश व्यक्त गरेका छन् । उनले ‘बेटी बचाऊ बेटी पढाऊ’ अभियानमा अनुसन्धान थालेर प्रदेश सरकारलाई बदनाम गर्न खोजिएको आरोप लगाए ।

प्रदेशसभाको वैठकमा बोल्दै मुख्यमन्त्री राउतले यस विषयमा स्पष्टीकरण दिन लामै समय खर्चिएका थिए । मुख्यमन्त्री कार्यालयलाई ‘प्रदेशको सिंहदरबार’ संज्ञा दिँदै उनले आफूलाई नसोधी अख्तियारले कारवाही गर्न नसक्ने दावी गरे ।

‘मलाई जानकारी गराएको भए म जे माग्नुहुन्छ त्यो दिन तयार थिएँ । प्रमुख सचिवलाई पनि जानकारी गराइएको छैन । प्रदेश सरकारलाई बदनाम गराउन षडयन्त्रपूर्वक हामीमाथि अट्याक गरिएको छ,’ उनले भने ।

आफूले अख्तियारका प्रमुखसँग पनि आफूले कुरा गरेको उनले बताए ।

उनले थपे, ‘मुख्यमन्त्री कार्यालय भनेको संस्था हो । प्रदेशको सिंहदरबार हो । प्रधानमन्त्री कार्यालय हो । सीमित बजेट र कर्मचारी भए पनि प्रदेशको आफ्नो गरिमा हुन्छ ।’

‘अहिले पनि म उहाँहरूलाई सम्मान नै गर्छु । तर, संघीयतालाई समाप्त गर्ने खेल भइरहेको छ । मानिसलाई गलत सन्देश दिने काम भइरहेको छ । यो संस्थामाथिको आक्रमण हो,’ राउतले भने ।