शंकर पोखरेलको बजेट परिमार्जन गर्दै प्रतिस्थापन विधेयक पेस, मुख्यमन्त्री ग्रामीण विकास कार्यक्रम खारेज

रुपन्देही । लुम्बिनी प्रदेश सरकारले ४० अर्ब ९५ करोड ९७ लाख रूपैयाँको नयाँ बजेट प्रस्तुत गरेको छ । यसअघिको सरकारले पनि यही अंकको बजेट ल्याएको थियो ।

आर्थिक मामिला तथा सहकारी मन्त्री कृष्णध्वज खड्काले प्रतिस्थापन विधेयकमार्फत परिमार्जित बजेट ल्याएका हुन् । कूल बजेटमध्ये चालु खर्चतर्फ १३ अर्ब ६४ करोड ५७ लाख १० हजार र पुँजीगततर्फ २२ अर्ब ४७ करोड १५ लाख रहेको छ । प्रतिशतका आधारमा कुल बजेटको ३३.३१ प्रतिशत चालु र ५४.८७ प्रतिशत पुँजीगत खर्चतर्फ हुन आउँछ । त्यसबाहेक ११.८२ प्रतिशत अर्थात ४ अर्ब ८४ करोड २३ लाख रूपैयाँ स्थानीय तहमा वित्तीय हस्तान्तरणका लागि विनियोजन गरिएको छ ।

मुख्यमन्त्री ग्रामीण विकास कार्यक्रम खारेज

लुम्बिनी प्रदेश सरकारको मुख्यमन्त्री ग्रामीण विकास कार्यक्रम खारेज भएको छ । प्रदेशसभामा प्रतिस्थापन विधेयकमार्फत नयाँ बजेट घोषणा गर्दै आर्थिक मामिला तथा सहकारी मन्त्री कृष्णध्वज खड्काले उक्त कार्यक्रम खारेज भएको बताएका हुन् ।

उक्त कार्यक्रमलाई ‘मुख्यमन्त्री शैक्षिक सुधार कार्यक्रम’ का रूपमा कार्यान्वयन गरिने उनले बताए । तत्कालीन मुख्यमन्त्री शंकर पोखरेल नेतृत्वको सरकारले सुरू गरेको यस कार्यक्रम प्रभावकारी नभएकाले खारेज गरिएको मन्त्री खड्काले बताए ।

एमालेको एमालेको बहिष्कार

आजको प्रदेशसभा बैठक प्रतिपक्षी दल नेकपा एमालेले बहिष्कार गरेको छ । ४ बजेदेखि सुरू भएको नवौं अधिवेशको सातौं बैठक एमालेले बहिष्कार गरेको हो ।

यसअघि दिउँसो १ बजे बसेको बैठकमा एमालेले नारावाजी गरेको थियो । पार्टीले कारवाही गरेका सांसदद्वय विमला वली र अजय शाहीलाई सभामुखले पदमुक्त नगर्दासम्म सदन चल्न नदिने अडान एमालेले लिएको छ ।

यस्तो छ- प्रदेशसभामा पेस गरिएको विधेयक