पूर्वमन्त्री लक्ष्मण घिमिरे कांग्रेस महाधिवेशन प्रतिनिधिमा पराजित, क-कसले जिते ? (सूचीसहित)

नेपाल प्रेस

२०७८ असोज २० गते १८:०६

काठमाडौं । नेपाली कांग्रेसका पूर्वकेन्द्रीय सदस्य तथा पूर्वमन्त्री लक्ष्मण घिमिरे महाधिवेशन प्रतिनिधिसभामा पराजित भएका छन् । गृहजिल्ला रामेछापबाट घिमिरे महाधिवेशनमा पराजित भएका हुन् ।

चौधौं महाधिवेशनको लागि प्रतिनिधि बन्नबाट घिमिरेसहित नेविसंघका पूर्वमहामन्त्री गजेन्द्र कार्की र पार्टीका निवर्तमान जिल्ला सभापति लवश्री न्यौपाने पनि वञ्चित भएका छन् ।

कुनै समय रामेछापमा एकछत्र नेतृत्व कायम गरेका कांग्रेसका पूर्व मुख्य सचेतकसमेत रहेका घिमिरे जिल्लाका सबैभन्दा सिनियर नेता हुन् । तर, भर्खरका विद्यार्थीहरूले भारी मतका साथ प्रतिनिधि निर्वाचित हुँदै गर्दा पाको पुस्ताका घिमिरे भने पराजित भए ।

२०४८ सालमा कांग्रेसबाट सांसद जितेर जलस्रोत मन्त्री भएका घिमिरे २०५१ मा एमालेका देवशंकर पौडेलसँग ११ मतले पराजित भएपछि प्रत्यक्ष चुनाव त्यसपछि जित्न सकेनन् ।

२०५६ मा एमालेकै कमल प्रकाश सुनुवारसँग पराजित भएपछि घिमिरे जिल्लाको सक्रिय राजनीतिबाट बाहिरिएका थिए । उनी २०६४ मा समानुपातिक सांसद भएपछि गिरिजाप्रसाद कोइरालाले मुख्य सचेतक बनाएका थिए ।

कांग्रेसको महाधिवेशन प्रतिनिधिमा जिल्लाका अन्य हेबिवेट नेताहरू रामचन्द्र खड्का, आङटावा शेर्पालगायत भने निर्वाचित भएका छन् । जिल्ला सभापतिमा कान्छाराम तामाङ निर्वाचित भएका छन् ।