सरल बैंकिङ सेवा सुरु, सबै बैंकको कर्जा र ब्याजदरको जानकारी एउटै प्लेटफर्ममा

काठमाडौं । निक्षेप कर्जा तथा ब्याजदरको सम्पूर्ण जानकारी सरलरुपमा प्रदान गर्ने उद्देश्यसहित सरल बैकिंङ्ग सेवा सञ्चालनमा आएको छ । बैंक तथा वित्तीय संस्थाहरुले प्रदान गर्ने कर्जा तथा व्याजदरसहित बैंकिङसम्वन्धी सम्पूर्ण जानकारी एउटै छातामुनि प्रदान गर्ने उद्देश्यले यो सेवा सञ्चालनमा आएको हो ।

आज घटस्थापनाको दिनदेखि सेवा सुरु भएको कम्पनीले जनाएको छ । सरल बैंकिङ्ग सेवामार्फत बैंक तथा वित्तिय संस्थाहरुले उपलब्ध गराउने निक्षेप कर्जा तथा ब्याजदरको तुलना गर्न सकिने छ । साथै, यसमा आफैंले कर्जाको लागि आवश्यक मासिक किस्ता (इएमआई) तथा इलिजिबिलिटी क्याल्कुलेट (योग्यता मापन) गर्न सकिनेछ । यसमा बैंक तथा वित्तिय संस्थाहरुले प्रदान गर्ने क्रेडिट कार्डबारे समेत जानकारी उपलब्ध छ ।

सरल बैंकिङ्ग सेवामा क्लिक गरेवापत ग्राहकले कुनै शुल्क तिर्नु पर्दैन । साथै, कर्जा तथा व्याजदर सम्बन्धि कुनै किसिमको जानकारी चाहिएमा ग्राहकहरुले सिधै साइटमा गएर त्यहाँ भएको च्याट बक्समा म्यासेज गरेर पनि सहायता लिन सक्नेछन् । अथवा दिइएको फोन नम्बरमा सिधै फोन गरेर पनि आवश्यक सहयोग लिन सक्नेछन् ।

‘सानोभन्दा सानो जानकारी प्राप्त गर्न पनि बैंक तथा वित्तिय संस्थाहरुको भ्रमण गरिरहनु पर्ने बाध्यताको अन्त्य गर्न पनि यस प्रकारको सेवाको सुरुवात गरेका हौ,’ कम्पनीका प्रवन्ध निर्देशक सुनिसकुमार लाखेले भने, ‘यसले नाम अनुसार ग्राहकहरुलाई सरल तरीकाबाट सेवाहरु प्रदान गर्नेछ ।’

केही समयपछि सेवाग्राहीले सरल बैंकिङ्ग सेवामा लग इन गरेर पनि आफूले चाहेको बैंक तथा वित्तिय संथामा सजिलै खाता खोल्न तथा कर्जाका लागि आवश्यक प्रक्रिया अगाडि बढाउन सकिने लाखेले जानकारी दिए ।