निजामती सेवा विधेयक फिर्ता गरेर सरकारले गल्ती गरेको एमालेको टिप्पणी (भिडिओ)

काठमाडौं । प्रमुख प्रतिपक्ष दल नेकपा एमालेले ‘निजामती सेवा विधेयक-२०७५’ फिर्ता गरेर सरकारले गल्ती गरेको टिप्पणी गरेको छ ।

एमालेका संसदीय दलका उपनेता सुवास नेम्वाङले संसदीय समितिमा समेत छलफल गरेर आएको सो विधेयक संसदबाट फिर्ता गरेर सरकारले बेठीक र उल्टो काम गरेको बताए । शुक्रबार संसद बैठकबाट बाहिरिने क्रममा उनले विधेयकहरूलाई फिर्ता लैजाने र अध्यादेशमार्फत् विधेयक ल्याउने काम गरे आफ्नो पार्टीलाई मान्य नहुने चेतावनी दिए ।

नेम्वाङले भने, ‘निजामती विधेयक लामो समय समितिमा छलफल भयो । बल्लबल्ल तपाईं-हाम्रो दबाबले संसदमा प्रवेश गर्‍यो । संसदमा त्यतिन्जेल रह्यो । अहिले आएर त्यसलाई फिर्ता लैजाने गरेर सरकारले बेठीक गर्‍यो । संसदमा विधेयक नै नल्याउने, भएको विधेयकलाई फिर्ता लैजाने अनि के गर्ने ?’

सरकारले अध्यादेशको बाटो रोजेर निजामती सेवा विधेयक फिर्ता लिनु उपयुक्त नभएको नेम्वाङको तर्क थियो ।