बालकोट वार्तापछि प्रभु साह सन्तुष्ट, अब एमालेमै सक्रिय हुने

काठमाडौं । लामो समयदेखि नेकपा एमालेबाट टाढिएर आइटी आर्मीको नाममा अलग्गै राजनीतिक संरचनाको अभ्यास गरिरहेका पूर्वमन्त्री प्रभु साह अब एमालेकै सांगठानिक दायरमा फर्किने भएका छन् ।

शुक्रबार अध्यक्ष केपी शर्मा ओली निवास बालकोट पुगेर नेताहरुसँग छलफल गरेपछि साह एमालेमै रहने भएका हुन् । आफ्ना माग र सरोकार सम्बोधन गर्न अध्यक्ष ओली तयार रहेकाले अब एमालेमै क्रियाशील हुने साहले बताए ।

बालकोटमा शुक्रबार करीव तीन घण्टा अध्यक्ष ओलीसहित बिष्णु पौडेल,शंकर पोखरेल,टोपवहादुर रायमाझी लगायतका नेताहरुसँग साहको छलफल भएको थियो ।

साहले राखेका ८ बुँदे माग अधिकांश पूरा भइसकेको र अध्यक्ष ओलीले दस्तावेजमै नेकपा एकताको निरन्तरता एमाले भएको भनिसकेकाले अब विमति नरहेको बताएका छन् । उनले बाँकी कुरा पार्टी कमिटीको बैठकबाटै समाधान हुने जानकारी अध्यक्षले दिएपछि आफू उत्साहित भएको नेपाल प्रेसलाई बताए ।

साहसँग पटक पटक छलफल गरेका एमाले नेताहरुले उनी अब पार्टी काममा फर्किने बताए ।