मोतिपुर घटनाबारे केन्द्रीय सुरक्षा बैठक : अतिक्रमणबाट औद्योगिक क्षेत्र जोगाउन गृहमन्त्रीको निर्देशन

रुपन्देही । गृहमन्त्री बालकृष्ण खाणले रुपन्देहीको मोतिपुर औद्योगिक क्षेत्रको जग्गा अतिक्रमणबाट जोगाउन निर्देशन दिएका छन् ।
जग्गा कब्जा गर्न गएको समूह र प्रहरीको झडपमा चारजनाको मृत्यु र दर्जनौं घाइते भएपछि सोमबार गृहमन्त्रालयमा केन्द्रीय सुरक्षा समितिको बैठक बसेको थियो । १६ जना सर्वसाधारण र ४९ जना प्रहरी घाइते भएकोमा चार प्रहरीलाई थप उपचारका लागि काठमाडौं लगिएको छ ।

गृहसचिव टेकनारायण पाण्डे, नेपाली सेनाका रथी बालकृष्ण कार्की, प्रहरी महानिरीक्षक शैलेश थापा क्षेत्री, सशस्त्र प्रहरी महानिरीक्षक शैलेन्द्र खनाल, राष्ट्रिय अनुसन्धान विभागका प्रमुख गणेश अधिकारीलगायतको बैठकमा गृह मन्त्री खाणले शान्ति सुरक्षा कायम राख्दै औद्योगिक क्षेत्रको जग्गा अतिक्रमण हुन नदिन निर्देशन दिएका हुन् ।

अतिक्रमणकारीले घरेलु हतियार र पेट्रोल बम प्रहार गरेपछि गोली चलाउन बाध्य भएको नेपाल प्रहरीले गृहमन्त्रीलाई जानकारी गराएको छ । बुटवलको मोतिपुरमा हिजोदेखिको कर्फ्यू जारी छ ।