मन्त्री बनेपछि पहिलोपटक गृहजिल्ला आउन लागेका खाणको कार्यक्रम वर्षाले प्रभावित

रूपन्देही । गृहमन्त्री बनेपछि पहिलोपटक गृहजिल्ला आउन लागेका गृहमन्त्री बालकृष्ण खाणको कार्यक्रम वर्षाले प्रभावित भएको छ ।

लगातारको वर्षाले त्रिभुवन अन्तर्राष्ट्रिय विमानस्थल काठमाडौंबाट भैरहवा विमानस्थलका लागि आउने विमान रोकिएकाले खाँणको भ्रमण तालिका प्रभावित भएको हो । उनी अहिले काठमाडौं विमानस्थलमा आएपनि रूपन्देहीमा मौसम नखुलेका कारण रोकिएको उनको सचिवालयले जनाएको छ ।

आज विहान ९ बजेर ४५ मिनेटमा भैरहवा आइपुग्ने कार्यक्रम भएपनि गृहमन्त्री खाण मौसमका कारण उडान डिले भएपछि काठमाडौंमै रोकिएका हुन् ।

वर्षासँगै मौसममा खराबी भएपछि भैरहवा विमानस्थलबाट आजका लागि तय भएको १९ वटा उडान अन्यौलमा परेको छ । विमानस्थलका प्रमुख प्रेमनाथ ठाकुरका अनुसार आज विहानका ४ वटा उडान नियमित अनुसार नै भएका छन् भने बाँकी रहेका १९ उडान अन्यौलमा परेका हुन् ।

काँग्रेस नेता स्व. प्रेम खरेलको शोक सभामा सहभागी रुपन्देही आउन लागेका खाणको रुपन्देही भ्रमणका लागि आज तय भएको समय तालिका प्रभावित भएको छ । असार २९ गते गृहमन्त्री बनेपछि उनी पहिलो पटक गृहजिल्ला आउन लागेका हुन् ।