जापानको आम निर्वाचनमा लिबरल डेमोक्रेटिक पार्टीलाई आफ्नै ‘बिरासत’ जोगाउन कठिन

जापान । जापानमा आगामी ३१ तारिख हुन गइरहेको आम निर्वाचनमा सत्तारुढ दल लिबरल डेमोक्रेटिक पार्टीले एक्लै बहुमत पु¥याउन नसक्ने प्रक्षेपण गरिएको छ ।

जापानको आर्थिक पत्रिका ‘निहोन खेइजाई’ ले १९ र २० तारिख गरेको सर्वेक्षणले डेमोक्रेटिक पार्टी एक्लैले भन्दा पनि कोमेइ पार्टीसहितको सत्तारुढ २ दलले बहुमत प्राप्त गर्ने देखाएको हो । कुल ४६५ सदस्य रहने संसदमा बहुमतका लागि २३३ सिट आबश्यक पर्दछ ।

जापानको अहिलेको संसदमा लिबरल डेमोक्रेटिक पार्टी २७६ सिटसहित एक्लै बहुमतमा छ । एकल बहुमत भए पनि कोमेइसँग सत्ता साझेदार गरेको लिबरल पार्टीले अहिलेको निर्वाचनबाट एक्लै बहुमत पुर्याउन कठिन रहेको उक्त सर्वेक्षणले देखाएको हो ।

२९ सिट रहेको कोमेइ जापानको तेश्रो ठूलो दल हो । सन् १९५८ देखि २००५ सम्म लगातार पहिलो दल बनेको लिबरल २००९ को आम निर्वाचनमा ११९ सिटमा जित निकाल्दै दोश्रो दलमा खुम्चिएको थियो । ४८० सिटका लागि निर्वाचन भएकोमा लोकतान्त्रिक पार्टी एक्लैले ३०८ सिटमा जित निकाल्दै जापानको पहिलो दल बन्न सफल भएको थियो ।

सन् २०१२ मा भएको आम निर्वाचनमा लिबरलले २९४ सिट जितेर लोकतान्त्रिक पार्टीबाट ‘पहिलो दलको’ उपाधी खोस्न सफल भएको थियो । सन् २००९ मा भएको निर्वाचनमा ३०८ सिट जितेको लोकतान्त्रिक पार्टीले २०१२ को निर्वाचनमा जम्मा ५७ सिटमा सीमित हुन पुग्यो ।

सन् २००९ मा भएको निर्वाचनको नतिजालाइ छोड्ने हो भने सन् १९५८ देखि हाल सम्म लिबरल डेमोक्रेटिक पार्टीले दोश्रो हुन परेको छैन । तर अहिलेको निर्वाचनमा उसको ‘दबदबा’ कमजोर हुन सक्ने पूर्वानुमान गरिएको छ ।

निक्केइ पत्रिकाको सहयोगमा