पत्रकार कल्याणकारी कोषको रकम आसेपासेलाई बाँडिएकोमा मुख्यमन्त्री केसीको आलोचना

रुपन्देही । आफ्ना नजिकका र पहुँचवाला सञ्चारमाध्यमलाई मात्रै बजेट वितरण गरेको भन्दै लुम्बिनी सरकारको आलोचना भएको छ ।

शंकर पोखरेल नेतृत्वको सरकारले बनाएको पत्रकार कल्याणकारी कोषको रकम काटेर विनियोजन गरिएको समाचार नेपाल प्रेसमा प्रकाशन भएको थियो । मुख्यमन्त्रीका प्रेस संयोजक मानसिंह विश्वकर्माको ‘अफसेट प्रेस’ को विकास तथा प्रवर्द्धनका लागि प्रदेश सरकारले छुट्टयाएको र अन्य आफू मातहतका सञ्चारमाध्यमलाई मात्रै बजेट विनियोजन गरेको भन्दै मुख्यमन्त्री कुलप्रसाद केसीको आलोचना सुरू भएको छ ।

प्रकाशन तथा प्रसारण समाजले सरकारले गलत काम गरेको भन्दै असन्तुष्टि जनाएको छ । बजेटमा तोक आदेशको भरमा निजी सञ्चारमाध्यमका घर बनाउने, पर्खाल घेर्नेदेखि लिएर उपकरण खरिद गर्नेजस्ता शीर्षकमा बजेट छुट्टाइनु बेथितिका उच्च नमुनाहरू हुन भन्ने ठहर भएको समाजका अध्यक्ष नवराज कुँवर र सचिव माधव नेपालले जारी गरेको विज्ञप्तिमा भनिएको छ ।

समाजले सञ्चारमाध्यमका प्रतिनिधिमूलक संघसंस्थाहरूले व्यवसायिक र गुणात्मक पत्रकारिताका लागि समानुपातिक विज्ञापन वितरणको व्यवस्था गरियोस् भनेर तत्कालीन आन्तरिक मामिला तथा कानून मन्त्री कुलप्रसाद केसी (हालका मुख्यमन्त्री) लाई २०७७ असार २३ गते ध्यानाकर्षण गरेको पुनः स्मरण गराएको छ ।

यस्ता बेथितिहरूलाई तत्काल रोकी सञ्चार माध्यमलाई नगद अनुदानभन्दा पनि समानुपातिक विज्ञापन वितरण प्रणाली लागू गर्न विज्ञप्तिमा जोड दिइएको छ ।

यस्तै यसअघिको सरकारले राखेका संचारसम्बन्धी कतिपय कल्याणकारी कोषको बजेट कटौती गरिएको हुँदा पुनः बजेटलाई पुनरावलोकन गरी बजेट तथा लुम्बिनी प्रदेश सरकार मिडियामैत्री बन्न समाजले आग्रह गरेको छ ।