बक्सअफिस : पछिल्लो साता कुन फिल्मले कति कमाए ?

काठमाडौं । जेम्स बन्डको २५ औं श्रृंखला ‘नो टाइम डाइ’ले नेपाली बक्सअफिसमा सन्तोषजक व्यापार गरेको छ । डेनियल क्रेग स्टारर फिल्मले पहिलो साता ३५ लाख ग्रस कमाएको छ ।

क्यूएफएक्ससहित मुलुकका ठूला मल्टिप्लेक्समा रिलिज भएको यो फिल्मलाई एप्पल इन्टरनेटमेन्टले ल्याएको हो । ‘अपेक्षाभन्दा माथिको कमाइ हो यो’ एप्पलका रुबेन श्रेष्ठले नेपाल प्रेसलाई भने, ‘फिल्मको कमाइ दोस्रो सातामा पनि सुखद हुने हाम्रो अनुमान छ ।’

एप्पलकै अर्को फिल्म ‘फास्ट एन्ड फ्युरियस’को नवौं श्रृंखला ‘एफ-९’ले पहिलो साता २० लाख ग्रस कमाएको छ । भिन डिजेल स्टारर यो फिल्म यसअघि नै डिजिटल प्लेटफर्मममा रिलिज भएपनि दर्शकको उपस्थिती भने आशालाग्दो देखिएको श्रेष्ठले बताए ।

दशैंमा रिलिज भएको शोभित बस्नेत निर्देशित फिल्मले भने घरेलु बक्सअफिसमा कमजोर व्यापार गरेको छ । निर्माता नवराज गिरीले फिल्मको व्यापार कमजोर भएको बताउँदै सार्वजनिक गर्न मानेनन् ।

अर्को दसैँ रिलिज धन्दागिरी पनि बक्सअफिसमा असफल भएको छ । कोभिड-१९ को दोस्रो लहरको कारण बैशाख १६ गतेदेखि बन्द रहेका फिल्म हलहरु असोज २१ गतेदेखि पुनः संचालनमा आएका थिए ।