‘कबड्डी ४’ छायांकन आजदेखि मुस्ताङमा सुरु, खोप लगाएपछि सुटिङ गर्न प्रशासनको अनुमति

काठमाडौं । फिल्म ‘कबड्डी ४ : फाइनल म्याच’ छायांकन हिमालपारिको जिल्ला मुस्ताङमा सुरु भएको छ ।

निर्माता मणिराम पोखरेलका अनुसार ३५ दिने सुटिङ तालिकाअन्तर्गत फिल्मलाई कोवाङ, लेते, मुक्तिनाथ, लार्जुङ लगायतका मुस्ताङी थलोमा खिचिने भएको छ ।

कलाकार र प्राविधिक सबैलाई कोभिड-१९ विरुद्धको खोप लगाएर छायांकन सेटमा प्रवेश गर्न अनुमति दिइएको हो । जिल्ला प्रशासन कार्यालय मुस्ताङले खोप लगाउनेलाई मात्र जिल्ला प्रवेशको अनुमति दिएको छ ।

‘हामीले स्वास्थ्य मापदण्ड पालना गर्दै फिल्म सुट गरिरहेका छौं । कलाकार र प्राविधिकलाई बाहिरी मान्छेसँग पनि भेट् गर्न दिएका छैनौं र सबैलाई खोप लगाइएको छ’ कोभिड प्रोटोकलबारे निर्माता पोखरेलले भने ।

रामबाबु गुरुङले निर्देशन गरिरहेको फिल्ममा दयाहाङ राई, सौगात मल्ल, विजय बराल, बुद्धि तामाङ, मिरुना मगर, गौमाया गुरुङ, पुष्कर गुरुङ, कविता आले, जयनन्द लामाको अभिनय छ । निर्माता पोखरेलले छायांकन सकिएपछि फिल्मको प्रदर्शन मिति घोषणा गर्ने तयारी गरिरहेको जानकारी नेपाल प्रेसलाई दिए ।