पदीय जिम्मेवारी पूरा गर्न नसकेपछि धनुषा र सर्लाहीका एसपीको सरुवा

जनकपुरधाम । प्रदेश २ का दुई जिल्लाका प्रहरी प्रमुखको काज सरुवा गरिएको गरिएको छ । धनुषाका एसपी प्रकाश रानाभाट र सर्लाहीका एसपी सन्तोषसिंह राठौर सरुवा भएका छन् ।

प्रदेश २ प्रहरी प्रमुख डीआईजी उमेश रञ्जितकारले प्रहरी प्रधान कार्यालयले एसपीद्वय रानाभाट र राठोरको काज सरुवा गरिएको जानकारी दिए । काज सरुवा किन गरिएको विषयमा उनले केहि बोलेका छैन् ।

एसपी कृष्ण प्रसाईलाई सर्लाही र एसपी बसन्त रजौरेलाई जिप्रका धनुषाको प्रमुख बनाएर पठाइएको छ । प्रसाई यसअघि २ नम्बर प्रदेश प्रहरी कार्यालयमा कार्यरत थिए ।

जनकपुरधामस्थित संघीय खानेपानी तथा ढल निकास कार्यालयका प्रमुख राजेश कुशवाहालाई जनमत पार्टीका कार्यकर्ताले अर्धनग्न बनाएर बजार घुमाए पनि प्रहरी केहि गर्न नसकेकोले धनुषाका एसपी रानाभाटको काज सरुवा गरिएको स्रोतले जनायो ।

यस्तै सर्लाहीमा गैरकानूनी काम बढेको र नियन्त्रण गर्न नसकेको आरोप एसपी राठोरमाथि छ । उनले तास खेलेको भिडियो पनि सार्वजनिक भएकाले सरुवामा परेका हुन् ।