प्रभु साहको आरोप- संघ र प्रदेशको उपचुनाव टार्न आयोग र सरकारको साँठगाँठ भयो

काठमाडौं । नेकपा (एमाले) का नेता प्रभु साहले संघ र प्रदेशको रिक्त ठाउँमा ६ महिनाभित्र उपचुनाव गराउनु पर्ने संवैधानिक व्यवस्था रहेको भन्दै चुनाव नगराउन निर्वाचन आयोग र सरकारबीच साँठगाँठ भएको आरोप लगाएका छन् ।

‘प्रत्यक्ष निर्वाचित सांसद वा प्रदेश संसदको पद रिक्त भएमा बढीमा ६ महिनाभित्र चुनाव गराउनै पर्ने संवैधानिक व्यवस्थालाई समेत नजरअन्दाज एवं खिल्ली उडाउँदै मेरो निर्वाचन क्षेत्रलगायत देशका अन्य रिक्त स्थानहरूमा निर्वाचन आयोग र अहिलेको यो अपवित्र गठबन्धनको सरकारले हालसम्म पनि उपनिर्वाचन गराउन नसक्नु वा नचाहनु भनेको खेद एवं दु:खको विषयमात्र नभइ देशमा विधिको शासन, कानूनी राज्य एवं हाम्रो संवैधानिक हकको ठाडो बरखिलाफ एवं उपहास पनि हो,’ साहले फेसबुकमा लेखेका छन्।

एमाले रोजेपछि साहलाई नेकपा (माओवादी केन्द्र) ले कारबाही गरिसकेको छ । दलीय अनुशासनको नाममा कारबाहीको डण्डा चलाउने प्रचण्डले पनि यसको जवाफ दिनुपर्ने उनले टिप्पणी गरेका छन् । साहले भनेका छन्, ‘जनतालाई लामोसमयसम्म जनप्रतिनिधिविहीन बनाइराख्ने निर्वाचन आयोग र अहिलेको अपवित्र गठबन्धनको सरकारको यो अक्षम्य अपराध हो ।’

तत्काल नैतिकताको आधारमा राजीनामा गर्न वा सार्वजनिकरूपमा आत्मालोचित भइ माफी माग्दै रिक्त स्थानहरूमा चुनाव गराउन उनले माग गरेका छन् ।