विवाद नसल्ट्याए आन्दोलन गर्ने सर्वोच्चका कर्मचारी संगठनहरूको चेतावनी

काठमाडौं । सर्वोच्च अदालतका कर्मचारी आवद्ध संघ/संगठनले प्रधानन्यायाधीश एवं न्यायाधीशहरूबीचको असमझदारीले मुद्दाको सुनुवाइ प्रभावित भएकोप्रति ध्यानाकर्षण भएको जनाएका छन् ।

संयुक्त विज्ञप्ति जारी गर्दै उनीहरूले मिडिया तथा सामाजिक सञ्जालमा न्यायालयको जनआस्था खस्काउने गरी समाचार प्रकाशन तथा प्रसारण भएको टिप्पणी गरेका छन् ।

अदालतभित्र देखिएका विकृति अन्त्य गर्न माग गर्दै सर्वोच्च अदालत आधिकारिक ट्रेड युनियन, नेपाल निजामति कर्मचारी युनियन, सर्वोच्च र नेपाल निजामति कर्मचारी संगठनले न्यायपालिकाको स्वतन्त्रताको रक्षाका लागि आन्दोलन गर्न बाध्य हुने चेतावनी दिएका छन् ।

‘न्यायपालिकामाथि चौतर्फी आक्रमण भइरहेको वर्तमान अवस्थामा न्यायपालिकाको स्वतन्त्रतालाई अक्षुण राखी जनआस्था अभिवृद्धि गर्ने जिम्मेवारी पूरा गर्नुपर्ने दायित्व निर्वाह गर्न सर्वोच्च अदालतमा कार्यरत हामी ट्रेड यूनियनहरूले रचनात्मक एंव सकारात्मक भूमिका निर्वाह गर्दै आइरहेको कुरा सर्वविदितै छ’, विज्ञप्तिमा भनिएको छ, ‘यस्ता असोभनीय गतिविधीले न्यायलय थप संकटतर्फ जाने भएको हुँदा अदालतभित्र देखिएका विकृति विसंगतीको अन्त्य गर्ने सम्बन्धमा प्रधानन्यायाधीश तथा सर्वोच्च अदालतका न्यायाधीशहरू जिम्मेवार भइ गम्भीरतापूर्वक अविलम्ब समूचित समाधान गर्न जोडदार माग गर्दछौं । अन्यथा न्यायपालिकाको स्वतन्त्रताको रक्षा एवं न्यायका उपभोक्ताको न्याय पाउने अधिकारको संरक्षणका खातिर आन्दोलनका कार्यक्रम अघि बढाउन बाध्य हुनेछौं ।’