विवेकशील साझामा पाण्डेको अधिकार खोसियो, कार्यकारी भूमिका अध्यक्षलाई मात्र

काठमाडौं । विवेकशील–साझा पार्टीमा संयोजक मिलन पाण्डेको अधिकार खोसिएको छ । आज बसेको केन्द्रीय समिति वैठकले विधान संसोधन गर्दै पार्टीको सम्पूर्ण कार्यकारी अधिकार अध्यक्षलाई प्रदान गरेको हो ।

अध्यक्ष र संयोजकको किचलोका कारण लामो समयदेखि पार्टी गतिहिन बनेको थियो । उनीहरुबीच सहमति नहुँदा केन्द्रीय समिति वैठक समेत बस्न सकेको थिएन ।

अन्ततः मिश्रले एकतर्फीरुपमा वैठक डाकेर विधान संसोधन गराएका हुन् । अब उनलाई एकलरुपमै पार्टी सञ्चालन गर्न बाटो खुलेको छ ।
आज बसेको वैठकमा अध्यक्ष र संयोजकलाई बराबरी कार्यकारी अधिकार रहँदा पार्टी सञ्चालन गर्न कठिनाइ उत्पन्न भएको केन्द्रीय सदस्यहरुले बताएका थिए ।

वैठकले पार्टीलाई अब तुरुन्तै वृहत्तर ध्रुवीकरण र एकतामा लिएर जाने र राष्ट्रिय राजनीतिमा हस्तक्षेपकारी शक्ति निर्माण गर्न आक्रामकरुपमा अघि बढ्ने निर्णय पनि गरेको छ ।