गुल्मीको रेसुंगा नगर कमिटीमा एमालेको सर्वसम्मत नेतृत्व

रूपन्देही । पाँच दिनअघि एमाले सचिव प्रदीपकुमार ज्ञवालीले उद्घाटन गरेको गुल्मीको रेसुङ्गा नगर कमिटीले बिहीबार राति सर्वसम्मत नेतृत्व पाएको छ ।

नेता ज्ञवाली निकट हरि पोखरेल र पदम अर्याल दुवैले नेतृत्व नछाडेपछि यति धेरै समय लागेको एमाले नेताहरूको भनाइ छ ।

बिहीबार साँझ नगर अध्यक्ष हरि पोखरेललाई सर्वसम्मत चयन गरिएको एमाले गुल्मी अध्यक्ष मधुकृष्ण पन्तले जानकारी दिए । सोही पदमा आकांक्षा राखेका अर्याललाई अन्यत्र व्यवस्थापन गर्ने सहमति भएको छ ।

कमिटीको उपाध्यक्ष देवीराम खनाल, सचिव सालिक बस्नेत तथा उपसचिव महेश काउछा र मिठू बोहरा निर्विरोध चयन भएको अध्यक्ष पन्तले बताए ।

१२ पालिका रहेको गुल्मीमा यसअघि ९ पालिकामा सर्वसम्मत नेतृत्व चयन भएको छ भने धुर्कोट र मदानेमा रोकिएको छ ।