ट्वान्टी-२० विश्वकप: लगातार जितपछि इंग्ल्याण्ड सेमिफाइनल नजिक

एजेन्सी । आईसीसी ट्वान्टी-२० विश्वकपमा इंगल्याण्डले गएराति अस्ट्रेलियामाथि ८ विकेटको जित हासिल गरेको छ । लगातार तेस्रो जितपछि ६ अंक बनाएको इंग्ल्याण्ड समूह १ बाट सेमिफाइनल नजिक पुगेको छ ।

१२६ रनको लक्ष्य इंग्ल्यान्डले ११.४ ओभरमा भेट्टायो । ओपनर जस बटलर ७१ रनमा अविजित रहे । अर्का ओपनर जेसन रोयले २२ रन बनाए ।

यसअघि दुबई अन्तर्राष्ट्रिय रंगशालामा टस हारेर ब्याटिङ गरेको अस्ट्रेलियाले इनिङको अन्तिम बलमा अलआउट हुनुअघि १२५ रनको योगफल खडा गरेको थियो । ओपनर तथा कप्तान आरोन फिन्चले ४४ रन बनाउनुबाहेक अरु ब्याट्सम्यानको प्रदर्शन सन्तोषजनक थिएन ।

बलिङमा इंग्ल्यान्डका क्रिस जोर्डनले ३ विकेट लिए । टाइमल मिल्सले २, आदिल राशिद र लियाम लिभिङस्टोनले १-१ विकेट लिए । इंग्ल्यान्डले पहिलो खेलमा वेस्टइन्डिजलाई ६ विकेट र बंगलादेशलाई ८ विकेटले हराएको थियो । यो समूहको शीर्ष स्थानमा रहेको उसले दक्षिण अफ्रिका र श्रीलंकासँग खेल्न बाँकी छ ।

अष्ट्रेलियाले पहिलो खेलमा दक्षिण अफ्रिकालाई ५ विकेट र दोस्रो खेलमा श्रीलंकालाई ७ विकेटले पराजित थियो । अस्ट्रेलियाले बंगलादेश र वेष्ट इण्डिजसँग खेल्न बाँकी छ ।