११ चर्चित गायक-गायिकाको स्वरमा भैलो गीत, समीक्षादेखि स्मारिकासम्म एउटै फ्रेममा (भिडिओ)

काठमाडौं । नेपालीहरूको दोस्रो ठूलो चाड तिहार घरदैलोमा आइसकेको छ । यस चाडलाई उल्लासमय बनाउन सबैले आ-आफ्नो तयारी गरिरहेका छन् ।

तिहार भन्नासाथै दिमागमा आइहाल्ने एउटा कुरा हो देउसी-भैलो । बालबालिकादेखि बुढाबुढीसम्मले घर-घरमा गएर देउसीभैलो गाउँदै रमाइलो गर्ने गर्छन् ।

यही परम्परालाई धान्न सघाउने गरी गायिका अनिता चलाउनेले तिहारलक्ष्यित भैलो गीत सार्वजनिक गरेकी छन् । यसगीतमा उनी स्वयंसहित ११ जना गायक-गायिकाले स्वर दिएका छन् । गीतमा श्रीकृष्णबम मल्लको शब्द र संगीत रहेको छ ।

९ मिनेट २२ सेकेन्डको यस गीतमा अनिता चलाउने, समिक्षा अधिकारी, एलिना चौहान, रचना रिमाल, मेलिना मैनाली, एन्जिला रेग्मी, बुद्ध लामा, रवी ओड, चक्र बम, योगेश काजी र श्रीकृष्ण बम मल्लको स्वर रहेको छ । यी सबै गायक-गायिकासहित चर्चित नृत्यांगनाहरू स्मारिका ढकाल र समारिका ढकाललाई गीतको भिडिओमा देख्न सकिन्छ ।

संगीतको माध्यमबाट तिहारको माहोललाई थप रंगीन बनाउनका लागि आफूले यो गीत निर्माण गरेको अनिताले बताइन् । उनको आफ्नै युट्यूव च्यानलबाट गीत अपलोड गरिएको गीतलाई १८ घन्टाभित्र ३५ हजारभन्दा बढीले हेरिसकेका छन् ।