काठमाडौं । कोरोनाका कारण गत वर्ष चाडवाडहरु खल्लो भए । यसपाली भने कोरोनाको प्रभाव मत्थर हुँदै गएकाले दशैं र तिहारको माहोल उल्लासमय बनेको छ । यही माहोलमा रौनक थप्न नेपाल प्रेसले देउसी–भैलोसहितको सांस्कृतिक कार्यक्रम मंगलबार साँझ आयोजना गर्‍यो ।

देशका चर्चित कलाकारहरुले नेपाल प्रेसको मिनभवनस्थित प्रधान कार्यालयको प्रांगणमा देउसी–भैलो खेलेका थिए । कलाकार टोलीको नेतृत्व गरेका थिए प्रख्यात लोकगायक बद्री पंगेनीले । उनले देउसी भट्याए भने अन्य कलाकारहरुले साथ थिए ।

कार्यक्रममा कलाकारहरुले विभिन्न गीत-संगीत, नृत्य तथा कमेडीसमेतको प्याकेज प्रस्तुत गरेका थिए । हास्यव्यंग्य कलाकार राजा राजेन्द्रले नेताहरुको क्यारिकेचरसहित प्यारोडी देउसी खेलेर पेट मिचिमिची हँसाए । उनको प्रस्तुतिमा राजनीतिक घोचेपेचका साथै सामाजिक सञ्जालमा भाइरल भएका विषयवस्तु पनि समावेश थिए ।

कार्यक्रममा अहिलेका चर्चित गायिकाहरु एञ्जिला रेग्मी, अनिता चलाउने, सिर्जु अधिकारी, डिजराज पौडेल र सुरेश रावलले विभिन्न गीतसंगीत प्रस्तुत गरेका थिए । यसैगरी नृत्यांगना कविता नेपालीको कार्यक्रमको बेल्ली डान्स विशेष आकर्षण बन्यो ।

कार्यक्रमको अन्त्यमा बद्री पंगेनी शिला आले र सिर्जु अधिकारीले दोहोरी गाएर कार्यक्रमलाई थप रमाइलो बनाए । कार्यक्रममा नेपाल प्रेसका संस्थापक निर्देशक ध्रुव शर्मा र प्रधान सम्पादक मात्रिका पौडेलले तिहारको शुभकामनासहित कलाकर्मीहरुलाई धन्यवाद ज्ञापन गरेका थिए ।