विवेकशील साझाको विवरण निर्वाचन आयोगमा अद्यावधिक, रविन्द्रसँग दुईतिहाई बहुमत

काठमाडौं । निर्वाचन आयोगले विवेकशील साझा पार्टीको बहुमतले गरेको निर्णय बमोजिम पार्टीको नयाँ विधान र केन्द्रीय कार्य समितिलाई आयोगको विवरणमा अद्यावधिक गरेको छ ।

आयोगले बुधबार सो पार्टीलाई पत्र पठाएर यसबारे जानकारी गराएको प्रवक्ता शरदराज पाठकले बताएका छन् । अब विवेकशील साझाको केन्द्रीय अध्यक्ष रविन्द्र मिश्र र १२४ जना केन्द्रीय सदस्य आयोगको आधिकारिक विवरणमा रहेका छन् ।

पाँचजनाको राजीनामा र एकजनाको निधनपछि अब सो पार्टीको केन्द्रीय समिति १२४ सदस्यीय भएको पाठकले बताए । मिलन पाण्डे समूहले भने सो निर्णय मानेको छैन ।

प्रवक्ता पाठकले भने, ‘अब उप्रान्त हाम्रो काम कारबाही नयाँ विधानअनुरूप अघि बढ्नेछ । साथै केन्द्रीय समितिको कूल सदस्य सङ्ख्या १२४ मानिनेछ । अतः अब पार्टीको काम कारबाही अघि बढाउन कुनै कानुनी अवरोध छैन । अध्यक्ष रवीन्द्र मिश्रले फरक मत राख्ने पार्टीका साथीहरूलाई विमति भए पनि केन्द्रीय समितिको अत्यधिक बहुमत र निर्वाचन आयोगको निर्णयलाई सम्मान गर्न विनम्र आग्रह गर्नुभएको छ ।’