जुवाखालबाट ६ लाख रुपैयाँसहित कांग्रेस जिल्ला सभापति पक्राउ

काठमाडौं । बौद्धस्थित एक जुवाखालबाट दोलखाका कांग्रेस जिल्ला सभापति वर्मा लामासहितका जुवाडे पक्राउ परेका छन् । प्रहरीले विशेष सूचनाका आधारमा बिहीबार राति जुवाघरमा छापा मार्दा कांग्रेस नेता समातिएका हुन्। जुवाखालबाट ६ लाख रुपैयाँ पनि बरामद भएको छ ।

दशैंअघिमात्र जिल्ला अधिवेशनबाट सभापतिमा निर्वाचित लामा २०७४ सालको निर्वाचनमा प्रदेशसभा सदस्यमा पराजित भएका थिए भने त्यसअघि मेलुङ गाउँपालिका अध्यक्ष उठेर एमालेका नरबहादुर श्रेष्ठसँग पराजित भएका थिए ।

लामासहित कांग्रेसका रामेछाप जिल्लाका केही नेता पनि रहेको तर उनीहरु भने भाग्न सफल भएको बताइएको छ । गत वर्ष पनि तिहारको दिन जुवा अखडामा छापा हान्दा कांग्रेस नेता तथा पूर्व गृहराज्यमन्त्री इन्द्र बानिया, तत्कालीन पर्यटन राज्यमन्त्री तथा हाल नेकपा एसका नेता धनवहादुर बुढा भाग्न सफल भएका थिए भने अन्य प्रतिष्ठित व्यवसायीहरु पक्राउ परेका थिए ।