रविन्द्र मिश्रलाई प्रकाशमानको आरोप : सानो पार्टी जोगाउन नसक्ने ठूला कुरा गर्ने ?

काठमाडौं । नेपाली कांग्रेसका नेता प्रकाशमान सिंहले वैकल्पिक राजनीतिको वकालत गर्ने विवेकशील साझा पार्टीका अध्यक्ष रवीन्द्र मिश्रप्रति कटाक्ष गरेका छन् ।

नेपाल संवत ११४२ का अवसरमा आफ्नै निर्वाचन क्षेत्रमा आयोजित कार्यक्रममा बोल्दै पूर्व महामन्त्री सिंहले सानो पार्टीसमेत राम्रोसँग चलाउन नसक्नेले ठूला कुरा गरेर जनतालाई भ्रमित बनाएको आरोप लगाए ।

‘चुनावको बेला नयाँ पार्टी खोल्ने, चर्का नारा दिने, ठूला कुरा गर्ने तर सानो पार्टीपनि चलाउन नसक्नेले काठमाडौंका जनतालाई झुक्याइरहेका छन्’, सिंहले भने । उनले काठमाडौं क्षेत्र नम्बर १ मा पढेलेखेका शिक्षित जनता रहेको भन्दै कसैले झुक्याउन नसक्ने बताए । फुटको संघारमा रहेको विवकेशी साझा पार्टीका अध्यक्ष मिश्र काठमाडौं क्षेत्र नम्बर १ मा सिंह विरुद्ध नै संसदीय निर्वाचन लडेका थिए ।

नेता सिंहले देश विकास गर्न कांग्रेसको विकल्प नरहेको पनि दावी गरे । पटक–पटक कम्युनिष्ट सरकार बनेपनि कांग्रेसले नै मुलुकलाई निकास दिनुपरेको बताउँदै सिंहले जनताले अब कांग्रेसलाई बहुमत दिनुपर्ने बताए ।