विमानस्थलमा पर्यटन बोर्डका सीईओ र भन्सारका कर्मचारीबीच लफडा

काठमाडौं । पर्यटन बोर्डका प्रमुख कार्यकारी अधिकृत (सिइओ) धनञ्जय रेग्मी र भन्सार विभागका कर्मचारी विवाद भएको छ । लण्डनबाट स्वदेश फर्किने क्रममा विमानस्थलमा चेकजाँचका क्रममा रेग्मीले हातपात गरेको कर्मचारीले आरोप लगाएका छन् ।

भाइटीकाको दिन बिहान सीईओ रेग्मी लण्डनबाट नेपाल आएका थिए । स्रोतका अनुसार उनले ६ बोतल मदिरा साथमा ल्याएका थिए । एक व्यक्तिले विदेशबाट आउँदा १ लिटर मात्रै मदिरा ल्याउन पाउने कानूनी व्यवस्था रहेको छ ।

भन्सार जाँचपासमा खटिएका नासु सुमन थापाले ६ बोतल मदिरा देखेपछि रेग्मीलाई सोधपुछ गरेका थिए । उनीहरूबीच त्यहीँबाट विवाद सुरू  भएको बताइएको छ ।

रेग्मीमाथि भन्सार ऐनअनुसार कारबाही चलाउँदै ५ हजार जरिवाना गराइएको छ । घटनापछि गरिएको मेडिकल टेस्टमा रेग्मीले मदिरासेवन गरेको पुष्टी भएको स्रोतको दाबी छ ।

३ दिनको कार्यक्रमका लागि पर्यटनमन्त्री प्रेम आले र सचिव यादव कोइरालासँगै सीईओ रेग्मी लण्डन गएका थिए । फर्कँदा त्रिभुवन विमानस्थलमा मन्त्री र सचिव विमानस्थलको भीआईपी लाउञ्जबाट निस्किए । तर, पर्यटन बोर्डका सीईओ रेग्मी आम यात्रुसँगै जाँचपासमा आएका थिए ।