ओलीको टिप्पणी-परमादेश सेटिङमा थियो भन्ने कुरा आफैं पोल खोलाखोल गर्दैछन्

विराटनगर । नेकपा एमालेका अध्यक्ष केपी शर्मा ओलीले असार २८ को सर्वोच्च अदालतको परमादेश पाँच दलीय गठबन्धन र न्यायाधीशहरूको सेटिङमा आएको थियो भन्ने पुष्टी भएको दाबी गरेका छन् ।

सोमबार विराटनगरमा कार्यकर्ता भेलालाई सम्बोधन गर्दै ओलीले सेटिङमा परमादेश आएको थियो भन्ने कुरा अहिले आफू-आफूमै पोल खोलाखोल गरेर पुष्टी गरिरहेको बताए ।

ओलीले भने, ‘न्यायाधीशज्यूहरू अहिले आफैं भन्दै हुनुहुनुहुन्छ । सेटिङ रहेछ उहाँहरूबीच । कसका कसलाई मन्त्री बनाइदिने, कसका कसलाई राजदूत बनाइदिने, कसलाई पदक र तक्मा दिने । यो त देखिएको कुरा भयो । नदेखिएको के-के लेनदेन भयो अझै खुल्न बाँकी छ ।’

ओलीले सर्वोच्च अदालतले प्रधानमन्त्री नियुक्त गर्ने नयाँ नजिर स्थापित भएको भन्दै यसको फल भोलि सबैले भोग्नुपर्ने चेतावनी समेत दिए । ओलीले अदालत आफ्नै परमादेशका कारण विवादमा परेको र जनताको नजरमा गिरेको आरोपसमेत लगाए ।