न्यायालयको समस्या त्यहीँभित्र हल भए हुन्थ्योः देव गुरुङ (भिडिओ)

काठमाडौं । नेकपा माओवादीका नेता देव गुरुङले न्यायालयमा उत्पन्न भएको समस्या त्यहीँभित्र हल हुँदा राम्रो हुने बताएका छन् । यदि न्यायालयभित्र समाधान ननिस्केमा दलहरूले सोच्नुपर्ने उनको भनाइ छ ।

सञ्चारकर्मीसँग आज कुरा गर्दै गुरुङले अन्तिम विकल्पको रुपमा मात्र न्यायालयको विवाद सदनमा जान सक्ने धारणा राखे ।

उनले भने, ‘सबै कानून व्यवसायीहरूको कुरा सुन्दा समस्या गम्भीर देखिएको छ । सबैभन्दा राम्रो उपाय भनेको त्यहीँभित्र समझदारी गरेर सेफल्यान्डिङ वा मार्गप्रशस्त गर्नु हो । हरेक कुरालाई विधि-प्रक्रियामा लैजाँदा राज्यका अंगको मर्यादा र विश्वसनीयतामा आँच आउन सक्छ ।’

अहिलेसम्म दलहरूबीचमा न्यायालयभित्रको समस्याबारेमा धेरै छलफल र बहस नभएको गुरुङले बताए । आफूले बुझेसम्म सबै दलहरू यो विषयलाई सम्वन्धित संरचनाभित्रैबाट समाधान भए हुन्थ्यो भन्ने पक्षमा रहेको उनले उल्लेख गरे ।

‘अहिलेको संक्रमणकालमा विधिमा मात्रै जाने कुरा गरेर हुँदैन । यो अवस्थामा सहमति, समझदारी र नैतिक दृष्टिले समस्या समाधान गर्न ध्यान दिनुपर्छ । तर, केही गरी समाधान निस्किन सकेन भने दलहरूले सोच्नुपर्ने स्थिति आउन सक्छ,’ गुरुङले भने ।

गुरुङले सरकार सञ्चालनका लागि संयन्त्रको तयारी भइरहेको बताए । सरकारको दैनिक कामभन्दा पनि राष्ट्रिय मुद्दाहरूमाथि छलफल गरेर निर्णय लिने गरी यस्तो संयन्त्र बनाइने उनले जानकारी दिए ।

‘विगतमा पनि निश्चित लक्ष्य प्राप्तिका लागि मोर्चा वा संयन्त्र बनाउने अभ्यास देखिन्छ,’ उनले भने, ‘आगामी दिनमा मोर्चा बन्यो भने राष्ट्रिय महत्वका निर्णय लिनुपर्दा संयन्त्रमा त्यहाँ ल्याएर छलफल गर्ने अभ्यास हुन सक्छ ।’

गुरुङले अमेरिकी सहायता परियोजना (एमसीसी) यथास्थितिमा पारित हुन नसक्ने बताए ।