अन्तर्राष्ट्रिय जलरंग प्रदर्शनीमा दुई नेपाली कलाकारको कलाकृति छनोट

चितवन । ट्रुली वाटरकलर अन्तर्राष्ट्रिय अनलाइन जलरंग प्रर्दशनीमा नेपालका २ जना कलाकारको कलाकृति उत्कृष्टमा परेका छन् ।

डी बरालले २५० डलर र विश्वराज पराजुलीले ५० अमेरिकी डलर पुरस्कारसमेत जितेका छन् । नगद पुरस्कारका अलवा केही उत्कृष्ट कलाकारले कला सामाग्री पुरस्कार स्वरुप प्राप्त गरेका छन्।

भर्चुअलविधिबाट हुने प्रर्दशनी यहि डिसेम्बर १० देखि २५ सम्म हुनेछ । आर्टसमेट ईन्टरनेशनल र एनवी गुरुङ आर्ट स्टुडियोको सहकार्यमा हुन लागेको प्रदर्शनीका लागि ५१ देशका ४ सय ८३ कलाकृतीको आवेदन संकलन भएको थियो । जसमध्ये ४६ देशका ३ सय २ कलाकृती प्रदर्शनीका लागि छनोट भएका छन्।

प्रर्दशनीलाई लक्षित गरेर गरिएको प्रतियोगितामा विभिन्न शीर्षकमा १३ जना कलाकारले पुरस्कार जितेका छन् । १ लाख ५० हजार नगद र ६० हजारभन्दा बढी मूंल्यको कलासामाग्री पुरस्कार जितेका हुन् ।

प्रथम पुरस्कार म्यानमारका थिन स्वीकीले ४ सय डलर प्राप्त गरेका छन् । चीनका रोङ जु कावोले ३ सय डलर जितेका छन् । थाइल्याण्डका टोसापोरन चान्टरासुकले २ सय डलर, रसियाका याकुवा भिक्टोरियाले १ सय डलर, म्यानमारका मियान्त नाइङले ५० डलर जितेका छन् ।

पुरस्कार छनोटका लागि ८ जना स्वदेशी तथा विदेशी कलाकार सम्मिलित समिति निर्माण गरिएको थियो। प्रर्दशनी युट्युव, अन्य सामाजिक सञ्जाल र आर्ट एनबी गुरुङ डटकममार्फत लाइभ हुनेछ । विश्व जलरंगमा कला क्षेत्रका स्थापित र नवप्रवेशीहरुले बनाएका कलाकृती एकैठाउँमा हेर्न पाइनेछ।