नेपाल बैंकर्स संघको नयाँ नेतृत्व चयन

काठमाडौं । नेपाल बैंकर्स संघमा नयाँ कार्यसमिति चयन भएको छ । मंगलबार भएको संघको साधारणसभाले बैंकर्स संघको अध्यक्षमा अनिलकुमार उपाध्यायलाई निर्विरोध निर्वाचित गरेको छ ।

उनी कृषि विकास बैंकका सिइओ हुन । नयाँ कार्यसमितको चयन भएसँगै बैंकर्स संघको अध्यक्षको रुपमा भुवन दाहालको २ वर्षे कार्याकाल समाप्त भएको छ । यसैगरी संघको उपाध्यक्षमा एनएमबि बैंकका प्रमुख कार्यकारी अधिकृत सुनिल केसी चयन भएका छन् ।

सदस्यहरु लक्ष्मी बैंकका सिइओ अजयकुमार साह, मेगा बैंककी सिइओ अनुपमा खुञ्जेली, नेपाल बैकका सिईओ कृष्णबहादुर अधिकारी, एसविआई बैंकका सिइओ दिपककुमार दे, सनराइज बैंकका सुमन शर्मा, माछापुच्छ्रे बैंकका सन्तोष कोइराला र एनआईसी एसिया बैंकका रोशनकुमार न्यौपाने चयन भएका छन् ।

यसैगरी संघका पूर्वअध्यक्षहरु अनिलकेशरी शाह, असोक राणा र ज्ञानेन्द्रप्रसाद ढुंगाना सल्लाहकार रहेका छन् ।