पर्यटनमन्त्री आलेको प्रतिबद्धता -डडेलधुरामा एयरपोर्ट बन्छ, चाहिए जति बजेट छुट्टिन्छ

डडेलधुरा । संस्कृति, पर्यटन तथा नागरिक उड्डयनमन्त्री प्रेम आलेले डडेलधुरामा एयरपोर्ट बन्ने बताएका छन् । सदरमुकाममा बुधबार आयोजित कार्यकर्ता भेलालाई सम्बोधन गर्दै उनले एयरपोर्ट निर्माणका लागि आफूले बजेट विनियोजन गर्ने प्रतिबद्धता जनाए ।

उनले डडेलधुराको अजयमेरू गाउँपालिका-१ पुइलेकमा विमानस्थल निर्माण गर्ने प्रतिबद्धता व्यक्त गरे । मन्त्री आलेले मंगलबारदेखि नेपाल नागरिक उड्डयन प्राधिकरणका उपप्रबन्धक नलविक्रम थापाको प्राविधिक टोलीले सर्भे गरिरहेको जानकारी गराए ।

उनले आफू काठमाडौं फर्किएलगत्तै वातावरणीय प्रभाव मूल्यांकन (ईआईए) का लागि २५ लाख बजेट विनियोजन गर्ने पनि बताए । ईआईएको काम सकिएलगत्तै विमानस्थल निर्माणका लागि जति बजेट चाहिए पनि मन्त्रालय त्यसको व्यवस्थापनमा लाग्ने आलेको भनाइ छ ।

उनले भने भने, ‘प्रधानमन्त्रीज्यूले छिटोभन्दा छिटो काम अघि बढाउनुपर्‍यो भन्नुभएको छ । तपाईंहरू ढक्क हुनुहोस् डडेलधुरामा एयरपोर्ट बन्छ ।’