मेटमणिले भने- नेकपा एसले उम्मेदवारी दिएकाे ठाउँमा कांग्रेस र माओवादीले छाड्ने सहमति भएको छ

रुपन्देही । नेकपा एकीकृत समाजवादीका केन्द्रीय सदस्य एवम् लुम्विनी प्रदेश कमिटी अध्यक्ष मेटमणि चौधरीले आगामी निर्वाचनमा आफ्नो पार्टीले उम्मेदवारी दिएको ठाउँमा कांग्रेस र माओवादीले उम्मेदवारी नदिने गठबन्धनसँग सहमति भएको खुलासा गरेका छन् ।

रुपन्देहीको देवदह नगर भेलामा बोल्दै नेता चौधरीले नेकपा एमालेलाई सबै ठाउँबाट हराउनका लागि गठबन्धनमा सहमति गरेर उम्मेदारी दिने सहमति यसअघि नै भएको बताएका हुन् ।

चौधरीले आगामी निर्वाचनमा एकीकृत समाजवादी पार्टी देशको ठूलो पार्टी बन्ने दावी गर्दै अबको निर्वाचनमा ओलीले नेतृत्व गरेको एमालेले कुनै ठाउँमा चुनाव नजित्ने दावी गरेका छन् ।

कम्युनिष्ट आन्दोलन र संविधान रक्षाको लागि नयाँ पार्टी निर्माण गर्नुपरेको बताउँदै उनले एकीकृत समाजवादी पार्टी निर्माण नभएको भए कम्युनिष्ट आन्दोलन समाप्त हुने तर्क गरेका थिए ।

दाङबाट प्रतिनिधि सभा सदस्य रहेका नेता चौधरीले ओलीले दुई पटक संसद विघटन गरेर संविधान विपरीत काम गरेको आरोप लगाउँदै भने– ‘संविधान रहँदासम्म कसैले संसद विघटन गर्न सक्नदैन तर ओलीले पटक पटक यही प्रकृयामा गएर कानुनको ध्वजी उडाए ।’

देवदह नगर भेलाले टंकप्रसाद पोखरेलको अध्यक्षतामा ५१ सदस्यीय नगर कमिटी गठन गरेको छ । जसको उपाध्यक्षमा शुसिला भट्टराई, डिल्लीराम सापकोटा, सचिवमा छवि भट्टराई, सहसचिवमा सिता विक, कुलबहादुर दर्लामी रहेका छन् ।

यसैगरी नगर भेलाले शंकर पंगेनीको अध्यक्षतामा ५१ सदस्यीय युवा संघ नेपाल नगर कमिटी गठन गरेको छ । त्यसैगरी पवन खरेलको अध्यक्षतामा ५१ सदस्यीय अनेरास्ववियू देवदह नगर कमिटी गठन गरेको सो पार्टीले जनाएको छ ।