बेलारुसविरुद्धको खेलमा बेलले जिते वेल्सबाट १००औं क्याप 

काठमाडौं । ग्यारेथ बेलले वेल्सको राष्ट्रिय टोलीबाट १०० क्याप जितेका छन् । विश्वकप छनोट अन्तर्गत शनिबार राति भएको खेलमा बेलारुसलाई ५-१ गोलले पराजित गरेको खेलमा वेल्सका लागि बेल दोस्रो १०० क्याप जित्ने खेलाडी बने ।

चार्लटन एथलेटिकका डिफेन्डर क्रिस गनटरले मात्रै बेलभन्दा धेरै पटक वेल्सको प्रतिनिधित्व गरेका छन् । बेलले वेल्सको सिनियर टोलीमा १६ वर्षको उमेमा २००६ मा डेब्यू गरेका थिए । र, राष्ट्रिय टोलीमा चम्किलो करियर बनाएका छन् ।

उनको नेतृत्वमा वेल्स ५८ वर्षमा पहिलो मुख्य प्रतिगोगिता युरो २०१६ मा क्वालिफाइ भएको थियो । उक्त प्रतिगोगितामा वेल्स सेमिफाइनलमा पोर्चुगलसँग पराजित भएको थियो ।

२०१८ को विश्वकपमा पुग्न नसकेको वेल्सले २०२० को युरोमा स्थान बनाएर अन्तिम १६ मा पुगेको थियो । बेलले वेल्स राष्ट्रिय टोलीको इतिहासमा सबैभन्दा धेरै गोल गरेका छन् । उनले अहिलेसम्म वेल्सबाट ३६ गोल गरेका छन् । जुन उनीभन्दा पछि रहेका इयान रेसको भन्दा ८ गोल बढी हो ।