युवराज संग्रौलाको सुझाव- सबै न्यायाधीश राजीनामा देऊ, भुपू प्रधानन्यायाधीशहरूले माफी माग

काठमाडौं । बरिष्ठ अधिवक्ता तथा पूर्वमहान्यायाधिवक्ता युवराज संग्रौलाले प्रधान न्यायाधीशसँगै अन्य न्यायाधीशहरूमाथि पनि पश्न उठेकाले सबैलाई राजीनामा दिएर न्यायपालिका शुद्धीकरणमा सघाउन आग्रह गरेका छन् ।

संग्रौलाले आफ्नो तीन बुँदे सुझाव सार्वजनिक गर्दै टीका लगाएर न्यायाधीश बनाइएको दोष लागेका सबैले राजीनामा दिनु उपयुक्त हुने बताएका छन् ।

संग्रौलाले भनेका छन्, ‘न्यायाधीशको बारेमा जब विवाद उठ्छ उसले न्यायको मर्यादाका लागि राजीनामा दिनुपर्छ । मेरो अनुरोध हो जब तपाईंहरूको नियुक्तिका बारेमा प्रश्न उठेको छ, न्यायको जग जोगाउन राजिनामा दिनुहोस् । इतिहासले सबै राम्रालाई मूल्यांकन गर्ने छ ।’

उनले हिजो गोजीबाट टिपेर न्यायाधीश नियुक्त गरिएको भन्दै नियुक्ति गर्नेमा चोलेन्द्र शमसेर जबरामात्र होइन अन्य भुपू प्रधानन्यायाधीश पनि दोषी रहेकाले उनीहरूले पनि जिम्मेवारी लिएर सार्वजनिक माफी माग्नुपर्ने बताएका छन् ।