प्रधानन्यायाधीशको राजीनामा माग गर्दै उच्च अदालत तुलसीपुरमा कानुन व्यवसायीको धर्ना

रूपन्देही । कानुन व्यवसायीहरूले प्रधानन्यायाधीश चोलेन्द्र शमशेर जबराको राजीनामा माग गर्दै शुरू गरेको आन्दोलन केन्द्रबाट प्रदेश र जिल्ला तहमा पुगेको छ ।

लुम्बिनी प्रदेशमा उच्च अदालत तुलसीपुर बुटवल इजलासमा कानुन व्यवसायीहरुले आज दोस्रो दिन पनि धर्ना दिएका छन्। उच्च अदालत बार एसोसिएसन बुटवलको आयोजनामा कानुन व्यवसायीहरुले प्रधानन्यायाधीशको राजीनामा माग गर्दै प्रदर्शन गरेका हुन्।

प्रधानन्यायाधीश जबरा आफै विवाद र भ्रष्टाचारमा डुबेर न्यायपालिकामा बिकृति विसंगतीलाई प्रश्रय दिएको भन्दै कानुन व्यवसायीहरुले उनको राजीनामा माग गरेको बताएका छन् । नेपाल बारको आन्दोलनमा एेक्यबद्धता जनाउँदै हातमा कालो पट्टी बाँधेर कालो व्यानरसहित अधिवक्ताहरुले बुटवल इजलासमा प्रदर्शन गरेका थिए। धर्ना बिहान १० बजेदेखि ११ बजेसम्म चलेको थियो।

बुटवल बारका अध्यक्ष जोगबहादुर खत्रीले तीन दिनसम्म इजलासमा प्रदर्शन गरिने बताए। ‘न्यायपालिकाको विकृति,विसंगति र भ्रष्टाचार बिरुद्ध धर्नामा बसेका हौं। यो आन्दोलनले दीर्घकालीन महत्व राख्छ, तत्काललाई सेवाग्राहीलाई असुविधा भएपनि हाम्रो आन्दोलनलाई अन्यथा नलिईदिन अनुरोध गर्छौ’ अध्यक्ष खत्रीले भने।

न्यायपालिकाको गरिमा कायम राख्न नसक्ने प्रधानन्यायाधीशले राजीनामा दिनुको विकल्प नभएको भन्दै उनले न्यायाधीश हरिकृष्ण कार्की नेतृत्वको समितिले दिएको प्रतिवेदन हुवहु कार्यान्वयन गर्न माग गरेको उनको भनाई छ । यता जिल्ला बार रूपन्देहीले पनि आफ्नो आन्दोलनलाई जारी रहेको अध्यक्ष लोकनाथ पन्थले जनाएका छन् ।

तर बारको आन्दोलनमा एमाले निकटका कानुन व्यवसायी खुलेर लागेका छैनन् । कानुन व्यवसायी यमलाल खनाल बारले शुरू गरेको आन्दोलन निहीत स्वार्थमा जोडिएकाले खुलेर समर्थन गर्न नसकिएको बताए ।

हामी बार भन्दा बाहिर छैनौं तर बारले एउटा व्यक्तिविरूद्वको आन्दोलनभन्दा समग्र न्यायलयका विकृतिविरूद्व आवाज उठाउनुपर्छ भन्ने हो, एउटै विषयमा जोडिएका अरू न्यायाधीश दुधले नुहाएका जस्तोगरी ढाकछोप गरिनु किमार्थ न्यायोचित होइन ।’ खनालले भने ।